Benedikti XVI në lutjen e Mbretëreshës Qiellore flet për shkëmbim dhuratash.
Në përfundim të Meshës, gjatë lutjes së Mbretëreshës Qiellore, Papa i falënderoi të
pranishmit, një det me njerëz, për pjesëmarrjen, duke pohuar se dhurata e tij për
familjet kroate është “feja e Pjetrit, feja e Kishës”, por duke kujtuar edhe
se, në këtë shkëmbim dhuratash, familjet kroate i dhurojnë Papës fenë e jetuar në
‘kishëzën e tyre shtëpijake’, pasuria më e çmuar e Kishës universale. Së fundi, Ati
i Shenjtë ia besoi familjet kroate Virgjërës Mari: “Në këtë çast i lutemi Asaj,
shpirtërisht të drejtuar kah Shenjtërorja e Marija Bistrica, e ia besojmë mbarë familjet
kroate: prindërit, fëmijët, gjyshërit, udhën e bashkëshortëve, impenjimin edukativ,
punën profesionale e shtëpijake. E i kërkojmë të ndërmjetësojë, që institucionet ta
mbështesin gjithnjë familjen, qelizë e organizmit shoqëror”. Në përfundim të
lutjes, Papa kujtoi Takimin VII botëror të familjeve, që do të mblidhet vitin e ardhshëm
në Milano. Përshëndeti, pastaj, në disa gjuhë: në spanjisht kujtoi se vendit iberik
sot iu shtua një i Lum i ri, Huan de Palafoks i Mendoza, që nderohet edhe në Meksikë Në
këtë ditë të bukur, të ndiçuar nga dielli, që u duk me gjithë shkëlqimin e tij, pas
natës me shi, Benedikti XVI përshëndeti në gjuhën sllovene, serbe, maqedone, hungareze,
gjermane e, kryesisht, kroate, duke iu drejtuar kroatëve të shumtë mbledhur në hipodromin
e Zagrebit. Ndërmjet përshëndetjeve, edhe ajo në gjuhën shqipe, me të cilën e hapëm
programin tonë të sotëm.