Արամ Ա Կաթողիկոս Կը Գնահատէ Հայ Երաժշտութեան Տարածման Նպաստող Երգիչ-երգչուհիները։
Արամ Ա. կաթողիկոս, վերջերս ընդունեց հայ ժողովուրդի կեանքին մէջ հայ երաժշտական արուեստի
առաւել ծաղկման ու տարածման իրենց նպաստը բերող երգիչներ ու երգչուհիներ: Նախ Համազգային
Լիբանանի Շրջանային վարչութեան ատենապետին ընկերակցութեամբ վեհափառին այցելեց Յարութ
Փամպուքճեան: Յարութ Փամպուքճեան հանրածանօթ երգիչ է եւ մեծապէս սիրուած մեկնաբան յեղափոխական
ու ընդհանրապէս ազգային երգերու: Վեհափառը նաեւ ընդունեց մանկական երգերու ծանօթ մեկնաբան
Մակի Իսթիլեանը` ընկերակցութեամբ Մեծի Տանն Կիլիկիոյ կաթողիկոսութեան կիրակնօրեայ դպրոցներու
վարիչ տնօրէնին: Մակի Իսթիլեան վերջերս «Հայ մանուկի տարուան» առիթով երգահանդէսներ կազմակերպած
էր Լիբանանի մէջ: Վեհափառը նաեւ ընդունեց մանկական «Ծիածան» թատերախումբը` բեմադրիչ
Յարութ Հարպոյեանի գլխաւորութեամբ: Դարձեալ «Հայ մանուկի տարուան» առիթով, յիշեալ թատերախումբը,
կազմակերպութեամբ կիրակնօրեայ վարժարաններուն, երաժշտաթատերական ձեռնարկներ կազմակերպած
էր Լիբանանի մէջ: Վերոյիշեալ արուեստագէտ-արուեստագիտուհիները ընդունելով` վեհափառը
գնահատեց անոնց կատարած աշխատանքը` յիշեցնելով, որ հայ ժողովուրդին համար հայ մշակոյթը
կենսական կարեւորութիւն կը ներկայացնէ յատկապէս ինքնութեան պահպանման ծիրին մէջ: Հետեւաբար,
մեր մշակութային արժէքներուն առաւել հարստացումը եւ տարածումը հայ կեանքին մէջ նուիրական
պարտաւորութիւն մըն է բոլոր այն մշակներուն, որոնք իրենց կեանքը նուիրած են հայ մշակոյթին: