4 чэрвеня, падчас
пералёту з Рыма ў Загрэб, Бэнэдыкт XVI адказаў на пытанні журналістаў, якія суправаджалі
Святога Айца. Пытанні тычыліся розных сфераў. Папа расказаў аб адносінах паміж Апостальскай
Сталіцай і Харватыяй і сваіх асабістых успамінах аб гэтай краіне ў якой ён ужо быў
некалькі разоў. “Хачу сказаць, што ў Харватыі я бачыў народную пабожнасць, вельмі
падобную на тую, якая існуе ў маіх родных краях. - сказаў Папа - Я бачыў там вельмі
моцнае братэрства ў веры, у жаданні служыць Богу, у хрысціянскім гуманізме”.
Святы
Айцец выказаў упэўненасць, што большасць харватаў з вялікай радасцю чакаюць моманту
ўступлення ў Еўрапейскі Саюз, “таму што гэты народ з’яўляецца па-сапраўднаму еўрапейскім”.
Папа адзначыў, што Харватыя знаходзіцца ў сэрцы еўрапейскай культуры і гісторыі. Гаворачы
аб існуючым скептыцызме адносна інтэграцыі ў Еўрасаюз, Святы Айцец заўважыў, што для
Харватыі можа быць асаблівая місія, якая заключаецца ва ўмацаванні гістарычнасці культур
і разнароднасці, што з’яўляецца супольным багаццем Еўропы. “Еўрапейская самасвядомасць
з’яўляецца самасвядомасцю шматлікіх культур, якія аб’ядноўваюцца хрысціянскай верай
і хрысціянскімі каштоўнасцямі”, сказаў Бэнэдыкт XVI.