Papa në aeroportin e Zagrebit: "Ripropozoni vlerat e familjes"
Vlera e ndërgjegjes u përmend edhe sot paradite nga Papa Benedikti XVI, në fjalimin
e mbajtur në aeroportin e Zagrebit, sapo mbërriti në Kroaci. Pasi kujtoi vizitat e
të Lumit Gjon Pali II në këtë vend, Ati i Shenjtë iu drejtua familjeve kroate, të
cilat nesër kremtojnë për herë të parë Ditën Kombëtare të Familjeve Katolike, dhe
përmendi kontributin e vlerave morale e shpirtërore të kroatëve në rrënjët e krishtera
të Evropës, së cilës ky komb i përket. E pikërisht për rrënjët e Kontinentit të Vjetër,
Ati i Shenjtë tha: “Sfidat që rrjedhin
nga kultura bashkohore, e karakterizuar nga diferencimi shoqëror, nga qëndrueshmëria
e paktë dhe nga individualizmi, që favorizon një këndvështrim mbi jetën pa detyrime
dhe kërkimin e vazhdueshëm të “hapësirave private”, kërkojnë një dëshmi të bindur
e një dinamizëm të flaktë për promovimin e vlerave morale themelore, që janë në bazën
e jetës shoqërore dhe të identitetit të Kontinentit të Vjetër”. 20 vjet pas
shpalljes së pavarësisë e në prag të integrimit në Bashkimin Evropian, Kroacia e historia
e saj mund t’i shtyjnë popujt e tjerë të kontinetit të reflektojnë, duke i ndihmuar
ta gjallërojnë trashëgiminë e përbashkët të vlerave njerëzore e kristiane: “Kontribuoftë
kështu ky komb i dashur, i fortë në trashëgiminë e tij të pasur, që Bashkimi Evropian
ta vlerësojë plotësisht pasurinë shpirtërore e kulturore”. Benedikti XVI
kujtoi moton e udhëtimit “Së bashku në Krishtin”, i cili është edhe motoja e Ditës
së parë Kombëtare të Familjeve Katolike Kroate, që nesër paradite do të kremtojnë
me Papën, Meshën e Shenjtë në Hipodromin e Zagrebit, kulmi i vizitës papnore në vend: “Ky
çast i rëndësishëm qoftë rasti për ripropozimin e vlerave të jetës familjare e të
së mirës së përbashkët, për forcimin e unitetit, për gjallërimin e shpresës e për
të na udhëhequr drejt bashkimit me Zotin, baza e bashkëndarjes vëllazërore dhe e solidaritetit
shoqëror”. Duke falenderuar të gjithë ata, që kanë kontribuar në organizimin
e kësaj vizite e duke kujtuar sfidat që ka përpara Kroacia, Ati i Shenjtë kërkoi ndërhyrjen
e ndihmën e të Lumit Alojzije Stepinac, kardinalit kroat martir, që u shuajt në vitin
1960, si pasojë e viteve të gjata të burgimit nën regjimin komunist: “I shoqëroftë
ai brezat e rinj, që të jetojnë në atë dashuri e bamirësi, e cila e shtyu Zotin tonë
Jezu Krisht të japë jetën për të gjithë njerëzit”.