Візіт Бэнэдыкта XVI
у Харватыю, які пройдзе 4-5 чэрвеня, будзе мець вялікае экуменічнае значэнне. Біскупы
краіны спадзяюцца, што прабыванне Папы дасць новы імпульс для дыялогу паміж хрысціянскімі
канфесіямі. У суботу, 4 чэрвеня, у Загрэбе запланавана сустрэча Бэнэдыкта XVI з прадстаўнікамі
Праваслаўнай Царквы.
На думку Альда Сікавіча, з харвацкай праграмы Ватыканскага
радыё, узгадваючы досвед фашысцкага, а затым камуністычнага мінулага, грамадзянскай
вайны 90-х гадоў ХХ ст., экуменічныя адносіны ў Харватыі будаваць вельмі цяжка, асабліва
з Праваслаўнай Царквой. Паводле яго, рэлігія ў гэтым рэгіёне заўсёды была і будзе
звязана з палітыкай, і таму цяжка знайсці нейкі агульны шлях. Арцыбіскуп Загрэба,
кардынал Ёсіп Базаніч, ужо спрабаваў усталяваць кантакты, але, на жаль, з боку праваслаўных
сербаў не было ніякай рэакцыі.
Як ні ў адным іншым рэгіёне свету, на Балканах
адносіны паміж канфесіямі і рэлігіямі былі заўсёды абумоўлены сувяззю з палітычным
кантэкстам. У свой час, фашысцкі рэжым спрабаваў выкарыстоўваць у палітычных мэтах
як праваслаўе, так і каталіцызм, а улады Харвацкай Сацыялістычнай Рэспублікі спрабавалі
стварыць незалежны ад Апостальскай Сталіцы нацыянальны касцёл.