Міжнародныя арганізацыі: мільёнам чалавек на планеце пагражае голад
ОКСФАМ, гуманітарная
арганізацыя, якая намагаецца знайсці доўгатэрміновыя рашэнні ў барацьбе з беднасцю
і несправядлівасцю ў свеце, у сваім рапарце пад назвай “Стварай лепшую будучыню”,
адзначае, што пры адсутнасці эфектыўных мер, цэны на прадукты харчавання у свеце павысяцца
ў наступныя гады ў сярэднім у два разы, што павялічыць харчовы крызіс, у выніку чаго
мільёнам людзей на планеце пагражае голад. Гэтага можна пазбегнуць толькі шляхам рэформы
існуючай сістэмы вытворчасці і абмену ежы.
Паводле рапарту, сімптомы распаду
глабальнай харчовай сістэмы відавочныя: павелічэнне голаду, застой сельскагаспадарчай
вытворчасці, барацьба за кантроль над рэсурсамі зямлі і вадой, узрост цэнаў на прадукты
харчавання. “Наша планета можа пракарміць усё чалавецтва, а, у той жа час, адзін
з сямі чалавек у свеце пакутуе ад голаду”, - сказала Франчэска Петрэлі, прэзідэнт
ОКСФАМ-Італія. “У гэту новую эпоху крызіса, пракарміць свет будзе яшчэ цяжэй. Тэрмінова
трэба зрэфармаваць глабальную харчовую сістэму, каб прадухіліць голад мільёнаў чалавек,
жанчын і дзяцей”, - сказала яна.
Паводле былога Прэзідэнта Бразіліі Луіса Ігнасіо
Лула да Сільвы, “палітычныя лідэры павінны дзейнічаць зараз, каб усе мелі дастаткова
ежы на сваіх сталах”. “Не існуе ніякіх апраўданняў. У нас ёсць патэнцыял, каб пракарміць
усіх на планеце сёння і ў будучыні. Калі ёсць палітычная воля, ні ў кога не павінна
забірацца фундаментальнае права быць свабодным ад голаду”, - адзначыў ён.