Кардынал Марад’яга: Нобелеўская прэмія Абамы – была памылкай
Нобелеўская прэмія
для Абамы была памылкай, лічыць кардынал Оскар Радрыгес Марад’яга. Перад выбарамі
кандыдат у прэзідэнты меў цікавае бачанне і абяцанні. Але нічога не змянілася. Я расчараваны
ў ім. Гэта проста параза, - сказаў лацінаамерыканскі іерарх у інтэрв'ю штотыднёвіку
“Famiglia Cristiana”. Падчас нядаўняй сустрэчы “Caritas internationalis” у Рыме ён
быў паўторна абраны прэзідэнтам гэтай арганізацыі. Кардынал часта браў удзел ад імя
Апостальскай Сталіцы ў пасяджэннях Міжнароднага валютнага фонду і Сусветнага банка.
Гаворачы
аб паразе Абамы, іерарх прыводзіць прыклад незаконнага абароту наркотыкаў. Падчас
выбарчай кампаніі, гэта была адна з асноўных тэм. Потым раптам наступіла маўчанне.
Белы дом не вяртаўся больш да гэтай праблемы. Такім чынам, у Цэнтральнай Амерыцы сёння
трыумфуе наркапалітыка. Мексіка знаходзіцца пад кантролем наркакартэляў, незаконны
абарот наркотыкаў з'яўляецца асноўным сектарам эканомікі многіх краін. Але Белы дом
не хоча гэтым займацца, таксама як і свет, - дадаў гандураскі кардынал.
На
думку Прэзідэнта “Caritas internationalis”, найбольш актуальнай задачай з'яўляецца
рэфармаванне Арганізацыі Аб'яднаных Нацый. Сёння, адзіная прычына яе існавання, здаецца,
ціск на нацыянальныя ўрады, каб легалізавалі аборты і гейсаюзы. “Я ніколі не бачыў,
каб ААН з аналагічнай стараннасцю імкнулася бароцца з наркотыкамі і галечай, ці старалася
ажыццявіць так званыя “Мэты развіцця тысячагоддзя”, аб якіх забыліся”, - падкрэсліў
кардынал Марад'яга.
На яго думку, свету па-ранейшаму не хапае добрых лідэраў
з глабальным бачаннем развіцця. “На працягу многіх гадоў мы кацімся ўніз, - сказаў
ён. - Лічбы кажуць супраць нас. Чалавецтва жыве горш. Глабалізацыя не дапамагла, а
крызіс не прынёс пакаяння. Мы вярнуліся да тых жа фінансавых спекуляцый, без якіх-небудзь
абмежаванняў. Што яшчэ горш, прадметам спекуляцыі сталі рэчы першай неабходнасці,
такія як: прадукты харчавання і вада, якія павінны быць абаронены дзяржавай. Аднак
ва ўрадах не хапае сёння сапраўдных палітыкаў. У большасці краін сёння не галасуюць
за дабро, але за меншае зло. Свет кіруецца прынцыпам “ратуйся, хто можа”, - заключыў
кардынал Радрыгес Марад'яга ў размове з італьянскім штотыднёвікам “Famiglia Cristiana”.