Бэнэдыкт XVI узначаліў набажэнства на заканчэнне “марыйнага” месяца

Вечарам 31 мая Бэнэдыкт XVI узначаліў працэсію і малітву ружанца, якая адбылася ў Ватыканскіх садах, каля грота Найсвяцейшай Панны Марыі з Лурда, з нагоды заканчэння мая, месяца традыцыйна прысвечанага Багародзіцы. У гэты дзень Каталіцкі Касцёл адзначае свята Адведзінаў Найсвяцейшай Панны Марыі, калі ўзгадваецца момант сустрэчы Багародзіцы, якая насіла пад сэрцам Езуса, са св. Альжбетай, што знаходзілася на шостым месяцы цяжарнасці. У сваёй прамове Святы Айцец засяродзіў сваю ўвагу на разважані менавіта над гэтым момантам у гісторыі збаўлення чалавецтва.

“На заканчэнне гэтага месяца ў спеве праслаўлення хочам злучыць нашыя галасы з голасам Марыі. - сказаў Святы Айцец - Разам з ёй хочам праслаўляць Пана, за тыя цуды, якія ён працягвае здзяйсняць у гісторыі Касцёла і для кожнага з нас. Асабліва, з’яўляецца і застанецца крыніцай радасці і ўдзячнасці, тое, што гэты месяц, прысвечаны Марыі, пачаўся з беатыфікацыі Яна Паўла ІІ.” Якой вялікай ласкай для ўсяго Касцёла, з’яўляецца жыццё гэтага Папы!”, - адзначыў Бэнэдыкт XVI.

Папа падкрэсліў, што Марыя па-сапраўднаму паверыла, што “у Бога няма нічога немагчымага” і, упэўненая ў гэтым, дазволіла Святому Духу весці сябе ў штодзённай пакоры адносна яго планаў. “Як можна не жадаць для нашага жыцця, такога ж аддання? - сказаў Пантыфік - Таму, звяртаючыся сёння да “поўнай ласкі”, папросім яе таксама і для нас здольнасці казаць “так” у адказ на Божыя задумы. Няхай яна, якая прыняла ў сябе Слова Бога, якая даверылася Яму да канца, навучыць нас заўсёды шчыра адказваць на Яго планы, нават калі яны клічуць нас абняць крыж”.