31 мая ў Кіркуку,
на поўначы Ірака, хрысціяне і мусульмане разам маліліся, заклікаючы Маці Езуса, каб
у краіне спыніўся гвалт. Халдэйскі арцыбіскуп горада Луіс Сако запрасіў палітычных
і рэлігійных лідэраў Кіркука, каб разам аддаць пашану Маці Езуса на заканчэнне месяца
прысвечанага ёй.
У сваім звароце да прысутных іерарх адзначыў “важнасць гэтай
сустрэчы для хрысціян і мусульман” у перыяд “пакутаў” апошніх тыдняў. Хоць мы “перапужаныя”,
- сказаў ён, - мы аб’ядналіся, хрысціяне і мусульмане”, каб аддаць пашану Найсвяцейшай
Панне Мары, якая тут завецца “Маriamana”. “Асоба Панны Марыі стала месцам сустрэчы
паміж хрысціянамі і мусульманамі, - дадаў арцыбіскуп Кіркута, - але паміж намі існуюць
іншыя зыходныя пункты”.
Арцыбіскуп заявіў, што акрамя сённяшняй сустрэчы ў
Касцёле, ён спадзяецца на сумесныя сустрэчы ў мусульманскіх мячэцях, каб “стварыць
сапраўдную брацкую супольнасць, якая імкнулася б да пабудовы міру, стабільнасці і
бяспекі ў краіне”. “Мы іракскія хрысціяне, - сказаў арцыбіскуп Сако, - прывязаны да
нашых братоў мусульман, да нашых каранёў, да іракскай зямлі. Мы гатовы прыкласці любыя
намаганні для прымірэння”.
На заканчэнне набажэнства туркменскі шыіт, арабскі
суніцкі імам, курдскі імам і арцыбіскуп Сако выпусцілі галубоў, як сімвалу міру і
надзеі на тое, што Ірак можа перамагчы канфлікты і падзелы.