Значны прагрэс дасягнуты
ў дыялогу паміж хрысціянскімі Цэрквамі, лічыць кардынал Вальтэр Каспер. На думку іерарха,
які ўзначальваў Папскую раду па спрыянні хрысціянскаму адзінству, яшчэ нельга казаць
аб якой-небудзь форме адзінага Касцёла, але ўжо можна размаўляць аб адзіным хрысціянстве.
Аб гэтым кардынал Каспер напісаў у артыкуле, апублікаваным у прылажэнні нямецкага
выдання “Die Zeit” пад назвай “Хрыстус і свет”. Нагодай для артыкула стаў лютэранскі
Дзень Царквы, які распачынаецца заўтра ў Дрэздэне.
Былы кіраўнік Папскай рады
спрыяння хрысціянскаму адзінству напісаў, што “на працягу апошніх 40 гадоў у дыялогу
паміж хрысціянскімі Цэрквамі дасягнута так шмат таго, што аб’ядноўвае, што аб гэтам
нават не даводзілася марыць”. На думку нямецкага кардынала мэтай экуменізма не з’яўляецца
вяртанне або ўваход аднаго Касцёла ў другі, але “супольнае ўзрастанне ў паўсюднай
еднасці”.
Кардынал Каспер не пагаджаецца з меркаваннем, згодна з якім экуменізм
з’яўляецца стратным для католікаў. Іерарх мяркуе, што наадварот, “экуменізм заахвочвае
больш ахвяраваць і прымаць”. “Дзякуючы гэтаму, у нейкім сэнсе, ён робіць католікаў
больш каталіцкімі”, - адзначыў кардынал.
“На працягу апошніх гадоў экуменічны
дыялог датычыў вельмі вострых тэмаў”, - піша кардынал Каспер. Ён прывёў прыклад дыскусіі,
якая разгарнулася вакол дэкларацыі “Dominus Iesus” аб збаўчым адзінстве і паўсюднасці
Езуса Хрыста, абвешчанай у 2000 г. У дакуменце ўзгадваецца між іншым, што ў пратэстанстаў
ёсць недахоп атрыбутаў эклезіяльнасці хрысціянскіх супольнасцяў, якія не застаюцца
ў адзінстве з Рымам. Гэтыя словы вельмі востра былі ўспрыняты лютэранскімі Цэрквамі.
“Аднак, праз некаторы час, зноў стаў магчымым поўны ўзаемапавагі экуменічны дыялог”,
- адзначыў кардынал Вальтар Каспер.