Udhëtimi i Papës në Kroaci më 4 3 5 qershor, familja dhe Evropa ndër temat e udhëtimit
apostolik
Në Kroaci vazhdojnë përgatitjet për vizitën e Papës, në program më 4 e 5 qershorin
e ardhshëm. Udhëtimi i 19-të apostolik ndërkombëtar i Benediktit XVI, me moton “Së
bashku në Krishtin”, bëhet me rastin e Ditës Kombëtare të Familjeve katolike kroate.
Sot paradite, zëdhënësi i Selisë së Shenjtë, atë Federiko Lombardi u dha gazetarëve
detajet e fundit mbi kontekstin dhe kuptimin e këtij udhëtimi. Pasi kujtoi se Jozef
Racinger ka qenë dy herë si kardinal në Kroaci, atë Lombardi u ndal në kuadrin politiko-shoqëror
të vizitës. Këtë vit bie 20-vjetori i pavarësisë së vendit e të shkëputjes së tij
nga ish-Republika e Jugosllavisë. Kroacia pret me besim integrimin në Bashkimin Evropian,
gjë që do të përmendet edhe nga Papa: “Sigurisht, do t’i referohet kulturës,
traditës, identitetit të popullit kroat dhe aspiratave të tij në perspektivën e integrimit
në Bashkimin Evropian”. Drejtori i Sallës së Shtypit të Vatikanit ilustroi
çastet kryesore të udhëtimit. Të shtunën, më 4 qershor, pas ceremonisë së mirëseardhjes
në aeroportin e Zagrebit, Ati i Shenjtë do të shkojë në Pallatin presidencial për
t’u takuar me presidentin e Republikës, Ivo Josipoviç, i cili ka të përbashkët me
Papën, dashurinë për muzikën klasike. Pasdite, dy ngjarje kryesore: takimi me eksponentët
e shoqërisë civile, të kulturës dhe me krerët fetarë në Teatrin kombëtar kroat; Lutja
e mbrëmjes me të rinjtë në sheshin qendror të Zagrebit, ku priten 50 mijë vetë. Të
dielën paradite, çasti kulmor i udhëtimit: Mesha Solemne, që Papa do ta kremtojë në
hipodromin e kryeqytetit, me rastin e Ditës Kombëtare të Familjeve katolike kroate.
Priten 300 mijë vetë. Pasditen e 5 qershorit, Benedikti XVI do të shkojë në katedralen
e qytetit për Lutjen mbrëmësore e për t’u gjunjëzuar para varrit të të Lumit Stepinac,
protagonist e mbrojtës i lirisë së fesë gjatë diktaturës komuniste: “Bari i
madh i Kishës kroate, ipeshkëv e martir, vdiq si pasojë e sëmundjeve të marra në burg,
prandaj konsiderohet martir. Sigurisht, është figura mbizotëruese në atmosferën e
këtij takimi”. Pas vizitës tek kardinali-kryeipeshkëv i Zagrebit, Bozaniç,
Papa do të shkojë në aeroport për t’u kthyer në Romë. Të gjitha fjalimet e homelitë,
shpjegoi atë Lombardi, do të shqiptohen në italisht, të ndërprera herë pas here nga
përkthimi në kroatisht. Nuk do të mungojë edhe leximi i disa pjesëve drejtpërdrejt
në kroatisht nga Benedikti XVI. Së bashku me Papën do të shkojnë në Kroaci edhe kryetari
i dikasterit vatikanas për familjen, kardinal Antoneli dhe sekretari i përgjithshëm
i Sinodit të ipeshkvijve, imzot Eteroviç, me kombësi kroate.