Расія: Праваслаўная Царква супраць хрысціянафобіі ў свеце
30 мая Сінод Рускай
Праваслаўнай Царквы выступіў з адмысловай заявай у сувязі з ростам хрысціянафобіі
у свеце. “Праваслаўная Царква з глыбокай заклапочанасцю ўспрымае паведамленні, якія
прыходзяць з розных краін свету, аб праявах хрысціянафобіі. Хрысціяне падвяргаюцца
пераследу, становяцца ахвярамі нецярпімасці і дыскрымінацыі ў розных формах”, - напісана
ў заяве.
У дакуменце гаворыцца аб рознага роду выпадках дыскрымінацыі і нецярпімасці,
якія адзначаюцца апошнім часам у свеце. “У некаторых краінах, дзе хрысціяне складаюць
меншасць, іх свабода веравызнання істотна абмежаваная”. “У той жа час праявы хрысціянафобіі
маюць месца і ў краінах, дзе большасць грамадзян вызнае хрысціянства. Дамінаванне
жорсткага, а часам і агрэсіўнага секулярызму прыводзіць да таго, што хрысціяне выцясняюцца
з грамадскага жыцця, а публічныя заявы і дзеянні, прадыктаваныя хрысціянскай верай
– і ў першую чаргу звязаныя з маральнай ацэнкай падзей, якія адбываюцца ў грамадстве,
– выклікаюць негатыўную рэакцыю”.
Праваслаўныя іерархі заклікалі сусветную
супольнасць, рэлігійных лідэраў і ўсе адказныя грамадскія сілы да распрацоўкі ўсёабдымнага
і дзейснага механізму абароны хрысціян і хрысціянскіх супольнасцяў, якія падвяргаюцца
пераследу або абмежаванням у сваім рэлігійным жыцці і дзейнасці. Таксама Руская Праваслаўная
Царква выступіла з заклікам актывізаваць дыялог рэлігійных лідэраў з міжнароднай супольнасцю
з мэтай выпрацоўкі асноў мірнага суіснавання вернікаў, якія належаць да розных традыцый.