Бэнэдыкт XVI: быць хрысціянінам, не азначае “пераапранання” у адмысловае адзенне
30 мая Бэнэдыкт XVI
сустрэўся з прадстаўнікамі Папскай рады па новай евангелізацыі. У сваёй прамове да
ўдзельнікаў гэтай дэкастэрыі, Пантыфік выказаў надзею на вялікі ўклад, які можа зрабіць
рада ў працу, маючай адбыцца ў кастрычніку 2012 г., ХІІІ Агульнай ассамблеі Сінода
Біскупаў. Тэмай гэтага форума будзе “Новая евангелізацыя і перадача хрысціянскай веры”.
Папа
нагадаў, што тэрмін “новая евангелізацыя” уключае ў сябе патрабаванне абноўленай перадачы
Добрай Навіны. Яе аб’ектам з’яўляюцца людзі, што жывуць у сучасным сацыяльным кантэксце,
“у якім развіццё секулярызацыі пакінула глыбокі след нават на краінах з хрысціянскай
традыцыяй”. Святы Айцец падкрэсліў, што “крызіс, праяўляецца ў выключэнні Бога з жыцця
людзей, агульнай абыякавасці перад абліччам хрысціянскай веры, аж да спробаў яе маргіналізацыі
ў публічнай сферы”. “Нягледзячы на гэта, часта відавочным з’яўляецца жаданне людзей
прыналежыць да Касцёла”, - адзначыў Бэнэдыкт XVI.
Святы Айцец сказаў, што “абвяшчаць
Езуса Хрыста, адзінага Збаўцу свету, сёння больш складана чым у мінулым”. “Наша місія
не змянілася, так як і не павінен змяніцца энтузіязм і адвага, якімі валодалі Апосталы
і першыя вучні, - адзначыў Папа - Ласка місіі заўсёды патрабуе новых евангелізатараў,
здольных прыняць яе, каб збаўчае абвяшчэнне Божага Слова не аслабла ў зменлівых гістарычных
умовах”.
Бэнэдыкт XVI падкрэсліў, што Касцёл заўсёды прапаведваў збаўчую
таямніцу смерці і ўваскрасення Хрыста, але “сёння гэта прапаведванне патрабуе абноўленай
формы, неабходнай, каб пераканаць сучаснага чалавека, часта абыякавага і незацікаўленага”.
“Таму, новая евангелізацыя павінна лічыцца з патрабаваннем пошуку шляхоў, неабходных
для таго, каб зрабіць як мага больш эфектыўным абвяшчэнне збаўлення. - адзначыў Святы
Айцец - Для тых, хто застаецца звязаным з хрысціянскімі каранямі, але жыве ў цяжкіх
адносінах з сучаснасцю, важна даць зразумець, што быць хрысціянінам не азначае “пераапранацца”
ў адмысловае адзенне ў прыватным жыцці ці ў пэўныя моманты, але нешта жывое, што цалкам
ахоплівае, здольнае бачыць добрае, сярод таго што існуе сёння”.