Papa në lutjen e Mbretëreshës Qiellore: atje ku kumtohet Ungjilli, lulëzon jeta.
“Atje ku kumtohet, Ungjilli bën të lulëzojë jeta, ashtu si shiu, që reshet mbi tokën
e djegur nga thatësira”: këtë pohoi Papa në lutjen e djeshme të Mbretëreshës Qiellore,
kremtuar në Sheshin e Shën Pjetrit, në praninë e mijëra besimtarëve. Ati i Shenjtë
ripohoi me forcë se edhe sot, detyra kryesore e Kishës është ungjillëzimi, siç e kanë
dëshmuar figura të ndritura, si Shën Karl Borromeo, Nënë Tereza e Kalkutës dhe Karol
Vojtila, të cilin Jozef Racinger e quajti ‘misionar i madh’.
Atje ku arrin
Ungjilli, lulëzon jeta - nënvizoi Papa - që, gjatë lutjes së Mbretëreshës Qiellore
u ndalua posaçërisht tek fragmenti i shkëputur nga Veprat e Apostujve, atje ku përshkruhen
veprat e mrekullueshme të Filipit diakon, në Samari: “Filipi dhe dishepujt
e tjerë, me forcën e Shpirtit Shenjt, bënin në fshatrat e Palestinës, po atë, që kishte
bërë Jezusi: predikonin Lajmin e Mirë e bënin mrekulli. Ishte Zoti vetë ai, që vepronte
përmes tyre”. E kështu, vërejti Shenjtëria e Tij, ndodhte, çka ndodh kur
mbi tokën e rreshkur nga thatësira, nis të reshet shiu. E dheu merr jetë e vishet
sërisht me blerim. Kështu edhe kumtimi i Ungjillit, sjell jetë, kudo që përhapet Lajmi
i Mirë: “Duke lexuar këtë fragment, mendojmë pa dashur për forcën gjallëruese
të Ungjillit, i cili në rrjedhë shekujsh vaditi, si lum jetëdhënës, popullsi të tëra”. Më
pas Papa kujtoi disa shenjtorë të mëdhenj, që çuan shpresë e paqe në vendet ku kryen
misionin e tyre, duke nënvizuar emrat e Karl Borromeos, në Milano, në kohën e kolerës
e të së Lumes Nënë Terezë të Kalkutës. E ka edhe shumë misionarë të tjerë – shtoi
Papa – emrat e të cilëve i di veç Zoti, që dhanë jetën për të kumtuar Krishtin, duke
bërë që në shpirtrat e njerëzve të lulëzonte ai gëzim, të cilin vetëm Zoti di ta japë: “Ndërsa
sundimtarët e kësaj bote kërkonin të pushtotnin toka të reja për interesat e tyre
politike dhe ekonomike, lajmëtarët e Krishtit shkonin në të katër anët e botës, për
ta çuar Krishtin tek njerëzit e njerëzit tek Krishtit, duke e ditur mirë se vetëm
ai mund t’u japë lirinë e vërtetë e jetën e pasosur”. Edhe sot, pohoi Benedikti
XVI, detyra kryesore e Kishës është ungjillëzimi. Kisha duhet të vijojë me guxim shtegtimjn
e saj: “Si drejt popujve, që nuk janë ‘vaditur’ akoma nga uji i gjallë i
Ungjillit, ashtu edhe drejt atyre që, ndonëse me rrënjë të lashta të krishtera, kanë
nevojë për limfë të re, e cila sjell fryte të reja e ndihmon për ta rizbuluar bukurinë
dhe gëzimin e fesë”. Në vijim Papa kujtoi edhe të Lumin Gjon Pali II që,
nënvizoi, ishte misionar i madh. Karol Vojtila, vijoi Benedikti XVI, i dha një shtytje
të re misionit ‘ad gentes’ e njëkohësisht, edhe ungjillëzimit të ri. Dy detyra, të
cilat Papa ia besoi ndërmjetësimit të Marisë, së cilës iu lut: “Nëna e Krishtit,
shoqëroje kudo e kurdoherë kumtimin e Ungjillit, që kështu, të shtohen e të zgjërohen
në botë hapësirat, në të cilat njerëzit rigjejnë gëzimin e të jetuarit si bij të Zotit”. Në
çastin e përshëndetjeve drejtuar shtegtarëve, Ati i Shenjtë u ndal tek figura e motrës
Maria Serafina e Zemrës së Krishtit, lumnuar dje në Cerreto Sannita, të Italisë. Ndërsa
në gjuhën polake, kujtoi 30-vjetorin e vdekjes së kardinalit Stefan Vishinskij, Primat
i Mijëvjeçarit: “Wypraszając dar jego beatyfikacji… “Duke
u lutur për dhuratën e lumnimit – tha Benedikti XVI – mësojmë nga ai se duhet ta
lëshojmë plotësisht vetveten në dorë të Nënës së Zotit. Besimin e tij, shprehur në
fjalët: “E kam lënë gjithçka në dorë të Marisë”, duhet ta shikojmë si model të veçantë. Në
fund Papa kujtoi edhe Ditën e lehtësimit të vuajtjeve, kushtuar të sëmurëve, kremtuar
dje nga Kisha, në Itali.