Сёння я хачу распачаць
кароткі цыкл перадач, у якіх я зраблю агляд незвычайнай анталогіі тэкстаў, што вельмі
моцна паўплывала на духоўнае жыццё хрысціянскага Ўсходу. Назва гэтага зборніку - «Дабраталюб'е»!
Дабраталюб'е
і ісыхазм. Асноўныя звесткі
Дабраталюб'е - гэта самая вялікая і найбольш
вядомая ва ўсходняй хрысціянскай духоўнасці анталогія аскетычных твораў. Дабраталюб'е
змяшчае тэксты аўтараў IV-XV стагоддзяў, у асноўным грэцкіх і візантыйскіх.
У
анталогію ўваходзяць больш за 60 твораў 38 аўтараў. Яна быў складзена Нікадзімам Святагорцам
і Макарам з Карынфу, і ўпершыню пабачыла свет у 1782 годзе на грэцкай мове ў Венецыі.
Грэцкае слова φιλοκαλείν (filokalia) азначае даслоўна «любоў дабра і прыгажосці».
Мы будзем прытрымлівацца царкоўнаславянскай назвы «Дабраталюб'е», хоць на нашу мову
можна было б перакласьці назву гэтага збору, як «Дабралюбства»...
Цікава, што
поўная назва анталогіі змяшчае такі выраз: «Дабраталюб'е святых цвярозамудрых...». Слова
«цвярозамудры» паходзіць ад слова «цвярозамудрасць», якое ў сваю чаргу з'яўляецца
перакладам грэцкага слова nepsis. Даслоўна слова nepsis перакладаецца, як цвярозасць,
а ў аскетычных працах на рускай мове часцей за ўсё ўжываецца царкоўна-славянскае слова
«трезвение».
Відавочна, гаворка не ідзе тут пра цвярозасць ад спіртных напояў,
але пра пэўную асаблівую цноту прападобных айцоў.
Цвярозасць - гэта стан нястомнай
ўнутранай ўвагі, спалучанай з адкіданнем усякай думкі, якая стаіць на шляху да паяднання
з Богам. Сінонімам слова nepsis з'яўляецца вядомае слова ησυχια (hesychia) - духоўны
супакой, унутранае маўчанне і засяроджанасць.
Складальнікі Дабраталюб'я без
сумневу хацелі падкрэсліць, што зборнік змяшчае творы аўтараў, якія належаць да асаблівага
духоўнага кірунку - ісыхазму. Ісыхазм, як духоўны напрамак, падкрэслівае ролю нястомнай
ўнутранай малітвы, якая вядзе да стану духоўнага супакою і магчымасці ўспрыняць Божы
дар Фаворскага святла.
Дабраталюб'е і Айцы Пустыні
Дарагія сябры,
я спадзяюся што гэтыя разважаньні, дапамогуць вам разабрацца ў тым, што такое «Дабраталюб'е»
і натхняць вас на самастойнае прачытанне, калі не ўсёй анталогіі, то хоць бы некаторых
яе тэкстаў.
Я і сам не прачытаў усяго Дабраталюб'я цалкам, але люблю выбіраць,
чытаць і перачытваць тыя тэксты, якія гавораць пра малітву сэрца, Ісусаву малітву. Спадзяюся,
што ў мяне будзе яшчэ час расказаць вам аб гэтых тэкстах, а сёння я хацеў бы звярнуць
вашу ўвагу на гісторыю напісання трактатаў, якія ўвайшлі ў Дабраталюб'е.
Умоўна
можна вылучыць чатыры асноўных перыяды, у якія ўзнікалі аскетычныя пісанні:
1.
Духоўнасць Айцоў Пустыні (Егіпет) 2. Духоўнасць Сінайская (Сінай - гэта паўвыспа
ў Чырвоным моры, на мяжы паміж Азіяй і Афрыкай, частка тэрыторыі Егіпта) 3. Духоўнасць
Студыцкая (Канстанцінопаль - назва Стамбула да 1930 года) 4. Духоўнасць Афонскі
(Гара Афон - паўвыспа ва Усходняй Грэцыі)
Звернем сёння нашу ўвагу на Егіпет
— на Айцоў Пустыні і на раннехрысціянскіх аўтарах.
Духоўнасць Айцоў Пустыні
У
вытокаў духоўнасці, якую нам перадае Дабраталюб'е, знаходзіцца вопыт. Менавіта
ў пошуках гэтага вопыту, досведу людзі (па прыкладу Ісуса) сыходзілі ў пустыню, становячыся
першымі хрысціянскімі манахамі. Тут, на пустыні, яны хацелі ўсё сваё жыццё прысвяціць
малітве і глыбокаму духоўнаму жыццю з Богам.
Гэта не былі ўцёкі ад рэчаіснасці
свецкага жыцця, але перш за ўсё прагненне ўнутранага свету і самоты. Гэтыя людзі прагнулі
"ачысціць" і "абудзіць" сваё сэрца, каб ласкай Святога Духа, яно сталася жыллём самога
Бога. Пустыня - гэта не бестурботная хобіцкая нара, дзе вы адчуваеце сябе ў камфорце
і бяспецы, але наадварот - месца ваенных дзеянняў.
Менавіта тут, на пустыні,
чалавек сустракаецца адзін на адзін з сабой - пераадольвае розныя спакусы і сумнівы.
Менавіта пустыня ў стане адкрыць чалавеку яго сапраўдную сутнасць (тое, кім ён на
самай справе з'яўляецца) і паказаць яму новага чалавека (таго кім ён павінен стаць
паводле Божай задумы).
Менавіта пустыня вучыць чалавека аддзяляць важнае ад
другаснага: тут ён асабліва інтэнсіўна перажывае ўсё тое, што даводзіцца перажываць
ў жыцці кожнаму чалавеку. Усё гэта робіць духоўнасць Айцоў Пустыні ўніверсальнай -
яна ёсць правобраз кожнай духоўнасці, яна простая і даступная кожнаму хрысціяніну.