Atë Lombardi mbi udhëtimin e Papës në Zagreb: Kthim në Kroaci
Papa Benedikti XVI përgatitet të shkojë në Kroaci më 4 e 5 qershor. Është udhëtimi
i parë ndërkombëtar i tij në vitin 2011 e jo rastësisht, bëhet në një vend, ku 89,88%
e popullsisë e quan veten katolike. Kisha është e organizuar në gati 1.600 famulli,
me 25 ipeshkvij e 2.343 meshtarë dhe, jep kontributin e saj, sidomos në fushën e edukimit,
me 22 kopshte e shkolla fillore, me 12 shkolla tetëvjeçare e 7 shkolla të mesme e
universitare. Benedikti XVI do të arrijë në Zagreb më 4 qershor e gjatë vizitës
do të flasë gjashtë herë në publik, do të takojë presidenten e Kroacisë, eksponentë
të shoqërisë civile e të botës politike e akademike, si edhe do të lutet në mbrëmje
me të rinjtë. Më 5 qershor, mesha solemne me rastin e Ditës kombëtare të familjeve
katolike kroate në Hipodromin e Zagrebit, kremtimi i lutjeve mbrëmësore në katedralen
e Zojës së Madhe e më pas, kthimi në Romë, ku Papa parashikohet të mbërrijë në orën
21.15. Vizitës e rëndësisë së saj, ia kushton komentin e sotëm javor, zëdhënësi i
Vatikanit, atë Federiko Lombardi: “Benedikti XVI do të shkojë në Kroaci më
4 e 5 qershor. Është një kthim në këtë vend, pasi ai vetë ka qenë aty disa herë si
kardinal; është kthim edhe pse një Papë ka shkuar tri herë gjatë dy dhjetëvjeçarëve
të fundit. Pra, në një farë kuptimi, Papa është njeri i shtëpisë në Kroaci. Vend,
me rrënjë të thella të krishtera e katolike, ruajtur me besnikëri në kohë të vështira,
që nuk kanë munguar, sidomos gjatë shekullit të kaluar. Besnikëri, e shpërblyer me
afërsi e solidaritet të sinqertë nga ana e Selisë së Shenjtë. Kroacia përjeton
tani sfidën e shekullarizimit: familja, rinia janë fushat më të rëndësishme për ta
përballuar atë. Prandaj, çastet kyç të udhëtimit janë pjesëmarrja e Papës në takimin
e parë të familjeve katolike kroate e në takimin me të rinjtë, që kremtohet çdo dy
vjet. “Së bashku në Krishtin” thotë motoja e vizitës. Në një botë, në të cilën format
e komunikimit shumëfishohen dhe pushtojnë jetën, vërtet takimi e bashkimi ndërmjet
njerëzve duket se bëhet gjithnjë e më i vështirë. Kisha mbështetet te Krishti për
të përkrahur unitetin dhe misionin e familjes, si edhe për të ushqyer shpresën e rinisë
në të ardhmen. Kështu i shërben Kisha bashkësisë njerëzore, bashkësisë kombëtare,
e cila, me kalimin e fazës së turbullt të shpërbërjes së ish-Jugosllavisë, përgatitet
të integrohet më thellësisht në bashkësinë e popujve evropianë, duke hyrë në Bashkimin
Evropian. Papa uron dhe inkurajon që kjo të bëhet duke e pasuruar kulturën dhe vlerat
e traditës së madhe të popullit kroat. Figura të jashtëzakonshme vazhdojnë ta frymëzojnë
në rrugën e tij, si shkencëtari jezuit Ruxhero Boskoviç, i riu i Lum Ivan Merc e,
sidomos, bariu e martiri i madh, i Lumi kardinal Stepinac. Së bashku në Krishtin,
me Papën, duhet parë me besim e guxim e ardhmja”.