Հայկական Հնամեայ Սրբավայրերը Խղճալի վիճակի Մէջ։

Հայաստանի տարածքին Հայ ժողովուրդի պատմութեան ականատես հանդիսացող հարիւրաւոր հնավայրեր այսօր կը գտնուին խղճալի վիճակի մէջ։
՝՝Ճանաչիր քո երկիրը ՝՝երիտասարդական նախաձեռնութիւնը կ՛իրականացնէ ՝՝Մաքրե՛նք հնավայրերը ժամանակակից աղբից՝՝ կոչուած աշխատանքը, որուն ծիրէն ներս, նախաձեռնութեան անդամները կը մեկնին Հայաստանի տարբեր մարզերու մէջ գտնուող հնավայրեր եւ կը մաքրեն անոնց շրջակայ տարածքը։ Աշխատանքը կ՛իրականացուի մասնակիցներուն անձնական միջոցներով։
Մայիս 22-ին, երիտասարդները մեկնած էին Վայոց Ձորի Շատինավանք համալիրը (10րդ դար)։ Երբեմնի հռչակաւոր այս սրբատեղին, համապատասխան մարմիններու անտարբերութեան պատճառով, այսօր յայտնուած է աղէտի շէմին։ Շատին գիւղի բնակիչներուն համաձայն, վիճակը տարուէ տարի կը վատթարանայ։
՝՝Ճանաչիր քո երկիրը ՝՝ երիտասարդական նախաձեռնութեան անդամները փորձած են մաքրել Շատինավանքի շրջակայքը կուտակուած աղբը, սակայն յուշարձանի պահպանման խնդիրը պետական համապատասխան մարմիններու եւ Մայր Աթոռ Ս. Էջմիածինի մասնագէտներու հոգածութեան կարիքը ունի։ ՝՝Մաքրե՛նք հնավայրերը ժամանակակից աղբից՝՝ի յաջորդ աշխատանքը տեղի պիտի ունենայ Մայիս 29ին։