Հայաստան։ 76 Թեր Եւ 12 Դէմ Քուէներով Կ՝ընդունուի Ընտրական Օրէնսգրքի Բարեփոխումներու
Ծրարը։
Երէկ Հայաստանի խորհրդարանը աւարտեց Ընտրական Օրէնսգիրքի բարեփոխումներու ծրարի եւ յարակից
օրէնքներուն մէջ փոփոխութիւններ կատարելու քննարկումը երկրորդ ընթերցումով: Պետա-իրաւական
մնայուն յանձնախումբի ղեկավար Դաւիթ Յարութիւնեան նշեց, որ ծրարին մէջ նկատի առնուած
են նաեւ ընդդիմութեան` ՀՅ Դաշնակցութեան խմբակցութեան որոշ առաջարկները: Ազգային ժողովի
ՀՅԴ խմբակցութեան ղեկավար Վահան Յովհաննիսեան յայտնեց, որ համաձայնական կառավարութիւնը
ընդդիմութեան 4 առաջարկներէն միայն մէկը ընդունած է: Բայց, ըստ Վ. Յովհաննիսեանի, ատիկա
ալ յառաջընթաց է եւ յաջողութիւն: Քուէարկութեան ժամանակ Դաշնակցութիւնը դէմ քուէարկեց
Ընտրական օրէնսգիրքի բարեփոխումներու ծրարին, բայց ծրարը ընդունուեցաւ 76 թեր, 12 դէմ
եւ առանց ձեռնպահի քուէարկութեամբ: Նշենք, որ Ընտրական Օրէնսգիրքի վերջին` երրորդ
ընթերցումը պէտք է կազմակերպուի 24 ժամուան միջոցին, քանի որ կառավարութիւնը եւ Ազգային
Ժողովը այս քննարկման համար սահմանեցին յատուկ ընթացակարգ:
Երէկ խորհրդարանը երկրորդ
ընթերցումով քննարկեց նաեւ «Հանրային ծառայութեան մասին» օրէնքի փոփոխութիւնները, որոնք
կ՛ենթադրեն բարձրաստիճան պաշտօնատար անձերու համար Բարոյագիտութեան Յանձնախումբի ստեղծում: