Мальта: каталіцкія біскупы заклікаюць галасаваць на карысць сям’і
28 мая на Мальце адбудзецца
рэферэндум па пытанні легалізацыі разводаў. З гэтай нагоды мальтыйскія каталіцкія
біскупы скіравалі пастырскі ліст, у якім адзначаюць, што гэта праблема вельмі важная
для жыцця ўсяго грамадства, таму жыхары краіны павінны праявіць сваю грамадзянскую
і рэлігійную адказнасць і прыняць удзел у рэферэндуме.
“Пытанне аб разводзе,
гэта пытанне аб сям’і. - пішуць мальтыйскія іерархі - Менавіта сужэнства і сям’я
з’яўляюцца натуральным асяродзем, у якім асоба можа ўзрастаць ў атмасферы любові,
што вельмі важна для пабудовы моцнага грамадства. Аднак, калі ёсць недахоп любові
ў сужэнстве і сям’і, адкрываюцца раны, якія патрабуюць шмат часу для гаення”.
“Мы
ўсе ведаем людзей параненых у выніку разбітых сужэнстваў. - адзначаецца ў пасланні
мальтыйскіх біскупаў - Менавіта існаванне параненых асобаў пацвярджае, што мы як нацыя
павінны працягваць цаніць сям’ю. Як жэст любові да тых, хто пакутуе, і да будучых
пакаленняў, мы ўсе павінны спрыяць паляпшэнню сітуацыі з сужэнствам і сям’ёй, каб
паменшыць гэтыя пакуты”. “Такім чынам рэферэндум аб увядзенні права на развод у нашай
краіне, мае прамое дачыненне да пытання аб сям’і, да нашай пазіцыі як грамадзян і
да супольнага дабра народа”, - пішуць каталіцкія біскупы Мальты.
Іерархі дадаюць,
што “сваім голасам грамадзяне могуць будаваць і разбураць”. “Выбар на карысць непарушнага
сужэнства з’яўляецца вызнаннем веры ў сям’ю, збудаваную на сувязі любові, якая не
можа знікнуць; аднак выбар на карысць развода спрыяе разбурэнню сужэнства і сям’і,
і як наступства, разбурэнню каштоўнасцяў і якасці жыцця”, - напісалі ў сваім пасланні
мальтыйскія каталіцкія іерархі.