Dialogu ndërfetar: kardinali Toran dhe imzot Çelata, në Korenë e Jugut.
Kryetari dhe sekretari i Këshillit Papnor për Dialogun Ndërfetar, përkatësisht kardinali
Zhan-Lui Toran dhe kryeipeshkvi Pier Luigji Çelata, nisën sot një vizitë në Korenë
e Jugut, me ftesë të Komisionit Ipeshkvnor për Ekumenizmin dhe Dialogun Ndërfetar.
Shtegtimi do të përfundojë më 27 maj. Parashikohen takime me Presidentin e Republikës,
me Ministrin e Kulturës dhe me Drejtorin për Çështjet Fetare. Kardinali Toran e imzot
Çelata do të shkojnë për vizitë edhe në Jogue Order, Qendër e Budizmit Korean si dhe
në Qendrën e Konfucianizmit Korean. Do të takohen me përfaqësues të Budizmit e të
Konfucianizmit, me përfaqësues të besimeve vendase koreane si dhe me ato të protestantizmit.
Është në program edhe një konferencë, që do ta mbajë kardinali Toran në Seminarin
e Madh të Seulit, me temë “Dialogu ndërfetar sipas mësimeve të Papës Benedikti XVI”
si dhe një takim me përfaqësues të shtypit. Vizita do të përfundojë me Meshën solemne
në Shenjtëroren e Martirëve Koreanë “Cheoldusan”.