Сёлета Ватыканскае
радыё адзначае 80-годдзе свайго заснавання. З гэтай нагоды ў кожную сераду мы будзем
знаёміць вас з гісторыяй паасобных рэдакцый нашага радыё. Сёння пачнём з нашай, беларускай
праграмы.
Яна выходзіць ў эфір ужо больш за 60 гадоў, з 6 студзеня 1950 г.
Варта адзначыць, што менавіта Ватыканскае радыё першым пачало перадаваць праграмы
на беларускай мове з па-за межаў Беларусі. Першым кіраўніком Беларускай секцыі стаў
кс. Пётр Татарыновіч.
Да 1989 г., беручы пад увагу тагачасны стан Касцёла ў
Беларусі, асабліва недахоп ствятароў, беларускамоўныя перадачы Ватыканскага радыё
мелі асаблівае значэнне. Для многіх, гэта была адзіная магчымасць пашырыць свае рэлігійныя
веды і падтрымліваць сувязь з Паўсюдным Касцёлам.
Да 1989 г. рэдакцыя не
мела практычна ніякіх кантактаў з Беларуссю. У перыяд аднаўлення касцёльных структур
у краіне, Ватыканскае радыё пачало граць важную ролю ў гэтым працэсе. На дадзеным
этапе яно з'яўляецца «мастом» паміж Апостальскай Сталіцай і Каталіцкім Касцёлам у
Беларусі, а таксама адной з нешматлікіх крыніц поўнай і інтэгральнай інфармацыі аб
дзейнасці Святога Айца на беларускай мове.
Паколькі каталіцкія і рэлігійныя
праграмы амаль адсутнічаюць у радыёпрасторы Беларусі, беларускамоўнае вяшчанне Ватыканскага
радыё спаўняе вялікую фармацыйную ролю ў маральным, этычным, рэлігійным аспекце. Беларусь
з’яўляецца шматканфесійнай дзяржавай, таму праграма імкнецца аб’ектыўна прадстаўляць
рэлігійна-грамадскае жыццё і спрыяць згодзе і ўзаемнай павазе паміж прадстаўнікамі
ўсіх веравызнанняў у духу экуменізму. Галоўнае заданне праграмы на дадзеным этапе
– тонка адчуваць працэсы, якія адбываюцца ў Каталіцкім Касцёле ў Беларусі і беларускім
грамадстве, рэагаваць на іх у духу навучання Касцёла і, шчыльна працуючы з мясцовым
Касцёлам, дапамагаць у яго адраджэнні.