Dy javë pas votimeve të 8 majit, pas rinumërimit të votave, Komisioni Qendror Zgjedhor
shpalli fitues në bashkinë e Tiranës, Lulzim Bashën, me 81 vota më shumë nga kandidati
tjetër Rama . Një vendim ky që u kundërshtua nga Partia Socialiste, e cila ngriti
një padi për këtë çështje në Kolegjin Zgjedhor. Pra me katër vota pro e tre kundër,
Komisioni Qendror përmbysi rezultatin e Komisioneve Zonale, që i jepte Ramës 10 vota
më shumë se Basha. Kandidatit të qeverisë Berisha i rezultojnë tani 124.786 vota në
krahasim me 124.705 të Edi Ramës, ndërsa Hysni Milloshi, kandidati i Partisë Komuniste,
ka marrë 1.394 vota. Partia Socialiste dorëzoi sot në Kolegjin Zgjedhor kërkesë-padinë
për anullimin e vendimit të Komisionit, i cili i cakton Lulzim Bashës 81 vota më shumë
se kundërshtari i tij, pas rinumërimit të fletëvotimeve.
Sot paradite nuk
kishte protesta para selisë së Komisionit Qendror Zgjedhor, por kreu i socialistëve,
Edi Rama deklaroi hapur se koalicioni “Aleanca për të Ardhmen” nuk do ta njohë rezultatin
dhe u bëri thirrje ndërkombëtarëve të ndërhyjnë.
Pas mbledhjes së sotme, socialistët
kanë vendosur të presin përgjigjen e Kolegjit Zgjedhor. Vetë Komisioni Qendror u mblodh
për të shqyrtuar paditë e ankimimet, që kanë të bëjnë me procesin zgjedhor të 8 majit.