Արմենօֆաս Մարդասիրական Կազմակերպութեան Տարեկան Ժողովը։
Ուրբաթ 20 Մայիսին Անթիլիասի Մայրավանքին մէջ նախագահութեամբ Արամ Ա. Կաթողիկոսին , տեղի
ունեցաւ Արմենօֆասի տարեկան հանդիպումը: Արմենօֆասը Մեծի Տանն Կիլիկիոյ Կաթողիկոսութեան
եւ Զուիցերիոյ Բողոքական եկեղեցիներու ներկայացուցիչներուն մասնակցութեամբ հաստատուած
մարդասիրական կազմակերպութիւն մըն է, որուն նպատակն է օժանդակել ընդհանրապէս Մեծի Տանն
Կիլիկիոյ Կաթողիկոսութեան ու յատկապէս Յունաստանի Ազգ. Առաջնորդարանին ենթակայ Ազգ. Ծերանոցին
առնչուած ու մարդասիրական եւ ընկերային բնոյթ ունեցող ծրագիրներուն: Արմենօֆասի յանձնախումբին
Ատենապետուհին է Կիլիկիոյ Կաթողիկոսութեան կողմէ Տիկին Թենի Փիրի Սիմոնեան եւ Փոխ–Ատենապետը
Զուիցերիոյ եկեղեցիներուն կողմէ Մեթր Ֆրանսուա Փայօ: Յանձնախումբը յաջորդաբար իր հանդիպումները
կ’ունենայ Անթիլիասի, Աթէնքի ու Ժընեւի մէջ: Բացումը կատարելով հանդիպումին, Արամ
Ա. շեշտեց կարեւորութիւնը Արմենօֆասին, ըսելով՝ ՙԱրմենօֆասը միայն հիմնադրամ մը չէ բառին
նեղ հասկացողութեամբ, մեր հաւաքական յիշողութիւնը մեր կեանքին մէջ թարմ պահող կենդանի
յուշարար մըն է ան: Արմենօֆասը կը յիշեցնէ մեզի Զուիցերիոյ ժողովուրդին աջակցութիւնն
ու բարեկամութիւնը հայ ժողովուրդին նկատմամբ, յատկապէս ցեղասպանութենէն յետոյ: Հետեւաբար,
այսօր Արմենօֆասը կամուրջ մըն է երկու ժողովուրդներու ու եկեղեցիներու բարեկամութեան
ու գործակցութեան՚: Ապա ժողովը սկսաւ իր աշխատանքներուն: Տիկին Թենի Սիմոնեան ներկայացուց
Արմենօֆասի անցնող տարուան գործունէութեան նիւթաբարոյական տեղեկագիրը: Յատուկ կարեւորութեամբ
քննուեցաւ Արմենօֆասի պարզած տնտեսական ներկայ կացութիւնը՝ միջազգային տնտեսական տագնապի
ստեղծած դժուարութիուններու լոյսին տակ: Քննուեցաւ նաեւ Արմենօֆասի յառաջիկայի ծրագիրները:
Այս ծիրէն ներս յարմար նկատուեցաւ որ Մեծի Տանն Կիլիկիոյ Կաթողիկոսութեան տնտեսական յանձնախումբը
յառաջիկային իր տեսակէտը յայտնէ Արմենօֆասի դրամագլուխի լաւագոյնս օգտագործման գծով:
Յանձնախումբը նաեւ լսեց Աթէնքի Ազգ. Ծերանոցի նիւթաբարոյական տեղեկագիրը: Յայտնենք,
որ անցեալ տարի Արմենօֆասը երեսուն հազար զուիցերիական ֆրանք յատկացուցած էր Ծերանոցին:
Որոշեց 2011 տարուան համար նոյն գումարը դարձեալ յատկացնել երկու հանգրուաններով: