Мітрапаліт Мінска-Магілёўскі
арцыбіскуп Тадэвуш Кандрусевіч выступіў са зваротам, у якім паведамляе, што адзін
з найстарэйшых дзеючых каталіцкіх іерархаў свету – Апостальскі адміністратар Пінскай
дыяцэзіі кардынал Казімір Свёнтэк знаходзіцца ў цяжкім стане.
Мітрапаліт Кандрусевіч
адзначае, што малітвы вернікаў могуць стаць выразам падзякі кардыналу за тое, што
ён прысвяціў сваё жыццё служэнню Касцёлу і яго адраджэнню пасля гадоў ганенняў.
У
2010 годзе кардынал атрымаў траўму шыйкі сцягна, а затым перанёс некалькі хірургічных
аперацый. Некаторы час яго стан быў цяжкім, потым ён пайшоў на папраўку. Стан яго
здароўя пагоршыўся ў сярэдзіне сакавіка. З таго часу іерарх прабывае ў рэанімацыйным
аддзяленні бальніцы ў Пінску. Мітрапаліт Мінска-Магілёўскі заклікае ўсіх вернікаў
маліцца за кардынала Свёнтка, які знаходзіцца ў цяжкім стане і ўрачы робяць усё магчымае
для яго выздараўлення.
21 мая 2011 г. споўнілася 20 гадоў біскупскага служэння
кардынала Казіміра Свёнтэка, якое ён пачаў ва ўзросце 77 гадоў. У 1991 г. Папа Ян
Павел ІІ прызначыў яго Мітрапалітам Мінска-Магілёўскім і Апостальскім адміністратарам
Пінскай дыяцэзіі. У 1994 г. іерарх стаў першым беларускім кардыналам з 1798 г.