Me një Kremtim solemn Eukaristik në Salvador da Bahia, në Brazil, u shpall sot e Lume,
Shërbëtorja e Zotit Dulce Lopes Pontes (në shekull: Maria Rita), rregulltare e Kongregatës
së Motrave Misionare të Zojës së Papërlyer. Liturgjinë e kryesoi i dërguari i Papës
Benedikti XVI, kardinali Geraldo Majela Anjelo, kryeipeshkëv i San Salvadorit. Njihet
nga të gjithë si “Nëna e të varfërve”, ose si “Engjëlli i mirë i Bahias” për impenjimin
e saj në spitale e në edukimin e fëmijëve e të të rriturve në institucione katolike,
themeluar prej saj. Në vitin 1959, themeloi edhe Shoqatën e Veprave Sociale Motër
Dulce, e cila konsiderohet edhe sot një nga institucionet filantropike më të rëndësishme
të botës, me 2.300 bashkëpunëtorë e 600 vullnetarë në Brazil e jashtë tij. Murgesha
u shua më 13 mars 1992 në Bahia, e dobësuar jashtëzakonisht nga lodhja dhe sëmundja.