Obama ofron ndihma për Lindjen e Mesme

(19.05.2011 RV)Në një fjalim të shumëpritur për të lënë gjurmë në ngjarjet e pështjelluara të Afrikës së Veriut e të Lindjes së Mesme, presidenti amerikan Barak Obama paraqiti sot planin e tij në mbështetje të demokracive të reja. Shumë i ngjashëm me planin e propozuar për Evropën Lindore, pas rënies së komunizmit, ai bazohet mbi politikën e shkopit e të karrotës, por edhe në perspektivën e vendit që zë Amerika në botë, pas vdekjes së Osama Bin Ladenit. Obama godet ashpër me sanksione presidentin sirian Bashar Al-Asad për mënyrën e reagimit ndaj revoltave të popullsisë, por premton ndihmat amerikane për ato vende, që ecin drejt demokracisë. Egjipti e Tunizia janë shtetet, që do të përfitojnë më shumë. Uashingtoni do t’i falë Kajros 1miliard dollarë nga borxhi i jashtëm, ndërsa 1 miliard të tjerë do t’i jepen Egjiptit përmes investimit të kapitalit privat, duke nxitur hapjen e vendeve të reja të punës në sektorë të rëndësishëm të ekonomisë. Gjithashtu, SHBA-të do të realizojnë marrëdhënie të reja tregtare me Lindjen e Mesme dhe me Afrikën e Veriut, duke i nxitur institucionet ndërkombëtare të ndihmojnë sidomos Egjiptin dhe Tunizinë. Obama do të merret personalisht me paqen izraelito-palestineze. Ai u bëri të qartë palëve se do të rrezikojnë më shumë, nëse nuk do të merren vesh për paqen. Nesër, presidenti amerikan do të takohet me kryeministrin izraelit, Netanijahu.