Kryengritësit libianë morën në dorë qytetin e Bregës
(17.05.2011 RV)Zhvillime të reja në Libi. Kryengritësit morën sot në dorë qytetin
e Bregës, pas largimit të trupave të kolonel Gedafit, për të cilin është kërkuar mandatarrest
ndërkombëtar. Gjithashtu, NATO-ja bombardoi Tripolin e u preu rrugën forcave qeveritare,
në përpjekjen për të rimarrë në dorë Misratën. Ndërkaq, gjithnjë e më tepër eksponentë
të regjimit libian largohen nga vendi. I fundit, ministri i Naftës Shokri Ganem, i
cili, sipas televizionit “Al-Arabija” është bashkuar me Këshillin Kombëtar të Tranzicionit.
Ndërkaq, të dërguarit e Gedafit ndodhen sot në Moskë për takime me autoritetet. Ishin
parashikuar bisedime edhe me përfaqësues të kryengritësve, por këta të fundit i shtynë
për një datë të pacaktuar.