Հայաստանի նախագահ Սերժ Սարգսեան առջի օր ընդունեց Իտալիոյ Ֆրիուլի-Վենեզիա-Ճուլիա նահանգի
նահանգապետ Ռենցօ Թոնտոյի գլխաւորած պատուիրակութիւնը: Նախագահ Սարգիսեան նշեց, որ
հայ-իտալական բարեկամական յարաբերութիւնները աւանդական բնոյթ ունին եւ պատմութիւնը շատ
լաւ հիմք ստեղծած է այդ յարաբերութիւնները զարգացնելու համար: Նախագահ Սարգսեան ընդգծեց,
որ Հայաստան շահագրգռուած է Իտալիոյ հետ բազմաբնոյթ կապերու ու համագործակցութեան խորացումով
եւ չափազանց կարեւոր կը նկատէ քաղաքական երկխօսութեան, միջխորհրդարանական յարաբերութիւններու,
առեւտրատնտեսական, կրթամշակութային, զբօսաշրջութեան եւ այլ մարզերուն մէջ փոխադարձ գործակցութիւնը: Նախագահ
Սարգսեան անհրաժեշտ նկատեց նաեւ Հայաստանի եւ Իտալիոյ տեղական ինքնակառավարման մարմիններուն
միջեւ ապակեդրոնացած համագործակցութեան զարգացումը` ողջունելի նկատելով Ֆրիուլի-Վենեսիա-Ճուլիա
նահանգի եւ Տաւուշի մարզին միջեւ ամրապնդուող յարաբերութիւնները եւ փոխադարձ հետաքրքրութիւն
ներկայացնող մարզերուն մէջ համագործակցութեան ուղղութեամբ աշխատանքը: Նահանգապետ Ռենցօ
Թոնտօ յոյս յայտնեց, որ տեղական ինքնակառավարման մարմիններու մակարդակին վրայ յարաբերութիւններու
սերտացումը լրացուցիչ խթան հանդիսանայ երկու երկիրներու կառավարութիւններուն միջեւ համագործակցութեան
ընդլայնման եւ ամրապնդման համար: Ընդգծելով հայ-իտալական տնտեսական բաղադրիչի կարեւորութիւնը`
ան նշեց, որ գործարարական շրջանակներուն միջեւ անմիջական յարաբերութիւնները խթանելու
նպատակով իր գլխաւորած պատուիրակութեան հետ Հայաստան ժամանած են իտալացի գործարարներ,
որոնք իրենց հայ գործընկերներուն հետ պիտի քննարկեն փոխադարձ շահաւէտ եւ հեռանկարային
համագործակցութեան կարելիութիւնները: Հայաստանեան այցելութեան մասին ներկայացնելով
իր տպաւորութիւնները` իտալացի նահանգապետը նշեց, որ «Հայաստան կատարած այցելութեան ընթացքին
մենք գտանք մեր ընդհանուր քրիստոնէական արմատները: Ես չափազանց տպաւորուած եմ գեղեցիկ
Հայաստանով»: Իտալացի Նահանգապետը այցելեց նաեւ Հայոց Ցեղասպանութեան Յուշահամալիր,
որուն մասին ըսաւ, որ իրեն համար չափազանց յուզիչ եղած է այն, ինչ որ տեսած է եւ լսած: