Grevë e përgjithshme në Greqi kundër planit antikrizë
(11.05.2011 RV)Greqia në grevë të përgjithshme. Mijëra vetë demonstruan sot
në qytetet kryesore të vendit kundër planit antikrizë të qeverisë. Në Athinë, policia
përdori gazin lotsjellës për të shpërndarë manifestuesit. Jo më larg se dje, mbërritën
përfaqësuesit e Fondit Monetar Ndërkombëtar, të Bashkimit Evropian dhe të Bankës Qendrore
Evropiane, të cilët duhet të vendosin nëse është rasti t’i jepen fonde të tjera qeverisë
së Athinës. Pikërisht nga kryeqyteti na flet me telefon gazetari italian Stefano Verxhine: Pati
disa kortezhe në Athinë, njëri prej të cilëve është organizuar nga Pame, lëvizje e
Partisë Komuniste Greke; pastaj, një tjetër i anarkistëve përreth Politeknikumit dhe;
një kortezh i madh, organizuar nga dy sindikatat kryesore greke. Në thelb, të gjithë
kërkojnë të mos paguajnë ata për krizën, duke kundërshtuar masat e rrepta, që ka marrë
qeveria greke, e shtrënguar – siç thonë protestuesit – nga trojka ndërkombëtare. Është
greva e dhjetë brenda një viti, që kur Greqia pranoi planin e Evropës dhe të Fondit
Monetar Ndërkombëtar. Por kjo e sotmja është e veçantë, sepse kujton tri viktimat
e grevës së një viti më parë, që humbën jetën brenda një banke, të asfiksuar nga tymi
i bombave molotov. Ç’ka ndryshuar në Greqi, në krahasim me vitin e kaluar? Gjendja
është keqësuar e Greqia është varfëruar për shkak të masave të marra. Të paktën, me
sa shohim e me sa na tregojnë grekët… Shpenzimet publike janë shkurtuar rëndë, grekët
nuk marrin më rrogën e 13-të e të 14-të si më parë, janë zvogëluar pensionet e pagat,
si në sektorin shtetëror, ashtu edhe në atë privat. Njëkohësisht, është shtuar presioni
fiskal, janë rritur taksat. Tani, benzina kushton 1,80 euro për litër, ndërsa vitin
e kaluar çmimi ishte 50% më i ulët. Pra, gjendja është tepër shqetësuese. Trojka
ndërkombëtare ndodhet aktualisht në Greqi. Është folur për rishikimin e ndihmave,
por edhe për daljen e vendit nga euro. Cili është opinioni juaj? Po, janë të
gjitha zëra, hipoteza të vazhdueshme, përgënjeshtruar nga qeveria greke. Dje, fola
me zëdhënësin e kryeministrit Papandreu, i cili e përjashtoi absolutisht mundësinë
e një paketi të ri ndihmash, prej 60 miliard eurosh. Popullsia i konsideron ndihmat
si lajm të keq, pasi e kupton se ato shkojnë më tepër në favor të bankave ndërkombëtare,
me të cilat Greqia është në borxh, por njerëzit përfitojnë vetëm ndikimet negative
të këtyre fondeve. Prandaj, grekët protestojnë kundër qeverisë. Gjithsesi, duhet të
kujtojmë se vetëm kur erdhi Papandreu në pushtet, në vitin 2009, doli në shesh e vërteta
mbi borxhin publik, i cili ishte shumë më i lartë se ai, që deklarohej për vite me
radhë.