Պենետիկտոս ԺԶ Քահանայապետը Կը Հրաւիրէ Կաթողիկէ Բանուորական Շարժումը Հիւրընկալելու Օտարները։

Հռոմի մէջ, 6-8 մայիս տեղի ունեցաւ իտալական կաթողիկէ բանուորներու շարժումի 14-րդ համաժողովը։ Նորին Սրբութիւնը մասնակցողներուն ուղղած իր պատգամին մէջ կը հրաւիրէ զանոնք ըլլալու՝ վեհանձն, հիւրասէր եւ զօրավիգ գաղթականներու եւ փախստականներու հանդէպ, եւ մասնաւորապէս անոնց հանդէպ՝ որոնք թիրախ են արաբական աշխարհի մեծ յեղաշրջումին։ Նոյնպէս Սրբազան Քահանայապետը կոչ կ'ուղղէ կաթողիկէ աշխարհին որ իրենց կարողութիւններն ու իրենց հոգեւոր ու մտաւորական ոյժերը դնեն բոլորին ի սպաս։