Ужо амаль тыдзень
мінуў пасля беатыфікацыі Яна Паўла ІІ, а гэта падзея ўсё яшчэ ўмацоўвае нас у веры
і адбіваецца ў сэрцах вернікаў з розных куткоў планеты. Тэме беатыфікацыі благаслаўлёнага
Папы прысвечана сённяшняе разважанне ў рубрыцы “Octava Dies” кс. Фэдэрыка Ламбардзі,
дырэктара Ватыканскага радыё.
“Калі я ўбачыў труну ў адкрытай грабніцы Папы,
я адразу падумаў: Вось, ён зноў сярод нас!”, прыпамінае словы кардынала Дзівіша кс.
Ламбардзі. “Сапраўды, для верніка, Ян Павел ІІ заўсёды застаецца жывым і прысутным,
аднак нельга адмаўляць таго, што ў дні беатыфікацыі мы аднавілі яго прысутнасць сярод
народа Божага праз малітву і святкаванні, - кажа дырэктар Ватыканскага радыё - Гэта
былі дні вялікай ласкі. Так мы разумеем значэнне і важнасць беатыфікацыі, і асабліва
гэтай, ў жыцці Каталіцкага Касцёла”.
Кс. Ламбардзі адзначае, што “у вялікім
натоўпе людзей, які заставаўся каля плошчы св. Пятра да позняй ночы, былі шматлікія
маладыя сем’і, з дзецьмі, якія нарадзіліся ўжо ў двухтысячныя гады, дзецьмі, якія,
канешне, не ведалі папы Яна Паўла ІІ, але якія з’яўляюцца нашчадкамі пакалення “яго”
моладзі”.
“Ян Павел ІІ ведаў аб сваім заданні ўвесці Касцёл у трэццяе тысячагоддзе,
таму напрыканцы другога мілінеўма казаў да ўсяго народу Божага: “Duc in altum! Плыві
на глыбіню! Касцёл уваходзіць у глыбокае мора трэццяга тысячагодзя, але ведае, што
заўсёды можна разлічваць на падтрымку свайго вялікага Заступніка, які запрашае не
баяцца, - піша кс. Ламбардзі - Ён працягвае падтрымліваць з Неба веру народа Божага.
Ты нас шмат разоў благаславіў. Сёння мы просім цябе яшчэ : Святы Айцец, благаславі
нас!”