Papa për reformën liturgjike: gabohet kush ia kundërvë traditën progresit, liturgjia
është shenjë e Krishtit të gjallë.
(06.05.2011 RV)“Shumë shpesh krijohen kundërvënie të pamotivuara ndërmjet traditës
e progresit. Në realitet dy konceptet integrohen: tradita është realitet i gjallë,
e prandaj përfshin në vetvete edhe parimin e zhvillimit. Është një lloj si të themi
se lumi i traditës mbart me vete gjithnjë edhe ujin e burimit e, së bashku me të,
shkon drejt grykës e derdhet në det. Prandaj tradita e progresi në liturgji nuk duhen
parë kurrë në kundërvënie, duke pasur mirë parasysh se përtëritja e liturgjisë buron
nga vetë forca e Krishtit. Është shpirti i Zotit, ai që e gjallëron, me vetë praninë
e Tij”. Këto, e mendime të tjera, theksoi Benedikti XVI, duke iu drejtuar rreth 250
pjesëmarrësve në Kongresin ndërkombëtar të liturgjisë, organizuar me rastin e 50-vjetorit
të themelimit të Institutit Papnor Liturgjik, pranë Universitetit të Shën Anselmit,
të cilët i priti në audiencë, në Vatikan. Liturgjia, vijoi
të pohonte Papa, i jep forcë Kishës, i krijon kushte për ta parë Krishtin e ngjallur
në veprim, e edukon njeriun për të vënë në krye të vendit fenë e hirin hyjnor. E megjithatë,
shpesh, duke nisur nga Koncili II i Vatikanit e këndej, në fushën liturgjike vërehet
një farë kontradikte ndërmjet ithtarëve të së resë e mbrojtësve të së kaluarës. Papa
kujtoi se në kohën e Koncilit II të Vatikanit doli në plan të parë kërkesa për pjesëmarrjen
sa më aktive të besimtarëve në kremtimet liturgjike, përmes përdorimit të gjuhëve
kombëtare si dhe për studimin e vëmendshëm të riteve të kulturave të ndryshme: “Përveç
këtyre, që në fillim u pa qartë nevoja e studimit më të thellë të themelit teologjik
të liturgjisë, për të shmangur rrezikun e rënies në ritualizëm, në favorizim të subjektivizmit
ose të protagonizmit të kremtuesit, me qëllim që reforma të mirëpërligjej në fushën
e Zbulesës e në vijimin e traditës së Kishës”. Papa i ftoi të gjithë të
mos harrojnë se përtëritja e liturgjisë lidhet ngushtë me përtëritjen e gjithë Kishës
e se Kisha e merr pikërisht nga liturgjia forcën jetike, në ndihmë të popullit të
Zotit… “... që të mund ta jetojë liturgjinë si shprehje e Kishës në lutje,
si prani e Krishtit ndërmjet njerëzve e si aktualitet i historisë së shëlbimit. Në
veprimin liturgjik të Kishës është i pranishëm vetë Krishti: atë që bëri gjatë kalimit
të tij në mes të njerëzve, Ai vijon ta bëjë përmes veprimit të tij personal sakramentor,
qëndra e të cilit është Eukaristia”. Prej këndej, Papa nguli këmbë për
ruajtjen e drejtpeshimit ndërmjet traditës së madhe liturgjike të së kaluarës, me
atë të së sotmes.