Мінск: прамая трансляцыя з Ватыкану

Сёння ўвага ўсяго свету прыцягнута да Ватыкана, дзе папа Бэнэдыкт XVI абвясціў благаслаўлёным свайго папярэдніка Яна Паўла ІІ. Урачыстая цырымонія сабрала некалькі сот тысячаў пілігрымаў.

За ўрачыстасцю назіралі таксама і ў Беларусі. У мінскім архікатэдральным касцёле Імя Найсвяцейшай Панны Марыі была арганізавана прамая трансляцыя з плошчы св. Пятра. У храме сабраліся дзясяткі вернікаў, пасля чаго тут адбылася св. Імша падзякі за беатыфікацыю. Арганізатарам трансляцыі стаў ксёндз Антоні Клімантовіч, пробашч архікатэдральнага касцёла.

У Рым на цырымонію прыехалі дэлегацыі з больш ста краін, у тым ліку з Беларусі. Беатыфікацыю звычайна чакаюць дзесяцігоддзямі, а тут падрыхтоўчы працэс пачаўся праз год пасля смерці – што стала выключэннем, якое зрабіў для свайго папярэдніка папа Бэнэдыкт XVI.

Яшчэ пры жыцці Ян Павел ІІ быў адным з самых папулярных у свеце, ён аб'ездзіў з візітамі больш за сто краін, быў першым Папам які пайшоў на актыўны кантакт з іншымі канфесіямі і рэлігіямі.