Japoni: i besohen të Lumturit Gjon Pali II vuajtjet e popullit niponik.
“Një grup shtegtarësh të krishterë japonezë, të shoqëruar nga një rregulltar salezian,
arriti në Romë për të marrë pjesë në kremtimin e 1 majit e për t’ia besuar Papës polak,
vuajtjet që po jeton në këto ditë tragjike, populli japonez, duke kërkuar ndërmjetësimin
e Tij”. Njoftimin e jep, në agjensinë Fides, atë Mario Yamanouchi, mëkëmbës provincial
i salezianëve në Tokio. Saleziani japonez tregon se e gjithë bashkësia e vogël katolike
në Japoni, është mobilizuar për një pjesëmarrje sa më të thellë shpirtërore në këtë
ngjarje të madhe për Kishën universale. Të gjitha dioqezat e famullitë, duke i njoftuar
besimtarët për programin e kremtimit, i ftuan të bashkohen në Mbrëmësoret e lutjeve
e në Meshët Shenjte, kremtuar në të gjitha bashkësitë, sidomos atje, ku kryejnë misionin
salezianët. Edhe realitetet e tjera kishtare, si Fokolarinët e besimtarët e Udhës
së Re Katekumenale, organizojnë prej ditësh kremtime e takime, për t’u bashkuar,
nesër, shpirtërisht, me Kishën universale në Sheshin e Shën Pjetrit. Katolikët japonezë
e shikojnë Lumturimin edhe si mundësi për ungjillëzim, duke pasur parasysh se ftesa
për të marrë pjesë në kremtim, u është drejtuar edhe jo të krishterëve. E në sa Japonia
kalon një periudhë vërtet të vështirë, jeta e vepra e Gjon Palit II shërbejnë si mesazh
shprese e afërsie për të gjithë ata, që vuajnë. E kjo, sepse Papa misionar, që vuajti
vetë e që ishte tejet pranë të mjeruarve, sot vijon t’u prijë të krishterëve japonezë.
E frymëzuar prej Tij, Kisha katolike vendase e dëshmon dashurinë e Zotit për njeriun
përmes solidaritetit, lutjes e afërsisë me viktimat e tsunamit e të tërmetit.