Ян Павел ІІ – адзінаццаты благаслаўлёны Папа ў Каталіцкім Касцёле
У гісторыі Каталіцкага
Касцёла 79 Пантыфікаў былі абвешчаны святымі і 11 благаслаўлёнымі, уключаючы Яна Паўла
ІІ, цырымонія беатыфікацыі якога адбудзецца 1 мая. Цікава, што ўсе 11 папаў былі абвешчаны
благаслаўлёнымі на працягу апошніх 300 гадоў, у сваю чаргу, святымі за гэты перыяд
былі абвешчаны толькі два Рымскіх Пантыфіка – Пій V і Пій Х.
У перыяд Пантыфікату
Яна Паўла ІІ да ліку благаслаўлёных былі далучаны два Рымскіх Папы – Пій ХІ, папа
перыяду Першага Ватыканскага Сабору і Ян ХХІІІ, Папа Другога Ватыканскага Сабору.
Гэта падзея адбылася 3 верасня 2000 г.
У першыя стагодзі хрысціянства культ
мучанікаў і вызнаўцаў веры рэгуляваўся мясцовымі Касцёламі. Абвясціць чалавека святым
ці благаслаўлёным мог кожны дыяцэзіяльны біскуп, асабіста ці падчас сіноду. У ХІ стагодзі
быў устаноўлены прынцып, згодна з якім абвяшчаць святых і благаслаўлёных мог толькі
Рымскі Пантыфік, як кіраўнік Паўсюднага Касцёла. У 1234 г., падчас Пантыфікату Грыгорыя
ІХ гэта правіла набыло статус закона.
З ХІV ст. Апостальская Сталіца дазволіла
ўвядзенне культу некаторых Слугаў Божых для асобных тэрыторый. Слугамі Божымі абвяшчаліся
асобы, працэс кананізацыі якіх яшчэ не пачаўся. У сярэднявеччы тэрмін Слуга Божы адпавядаў
сучаснаму благаслаўлёнаму. Слугі Божыя абвяшчаліся святымі пачынаючы ад Пантыфікату
Сікста ІV. Менавіта ў гэты час з’явілася адрозненне паміж тэрмінам святы і благаслаўлёны,
якія на працягу сярэдневечча былі сінонімамі.
Працэдура кананізацыі была акрэслена
ў адпаведным дакуменце папы Бэнэдыкта XIV выдадзеным у 30-я гады XVIIІ ст. Нарэшце,
у 1983 г. былі ўстаноўлены ўсе сучасныя нормы, якія датычаць кананізацый і беатыфікацый.
Апостальскай канстытуцыяй “Divinus perfectionis Magister” устаноўлена, што прапанова
аб абвяшчэнні асобы святой павінна паходзіць ад дыяцэзіяльнага біскупа і быць перададзена
для разгляду ў Кангрэгацыю па справах Кананізацыі.