Англіканская Царква супраць шлюбаў членаў каралеўскай сям'і з католікамі
Англіканская Царква
выступіла супраць адмены брытанскім урадам дзеючага на працягу стагоддзяў закона,
які забараняе членам каралеўскай сям'і ўступаць у шлюб з католікамі. Намеснік прэм'ер-міністра
Брытаніі Нік Клегг дзеля ўстанаўлення роўнасці паміж рэлігіямі ўжо пачаў працаваць
над папраўкай да Акту аб атрыманні пасады ў спадчыну ад 1701 г., згодна з якім брытанскі
манарх павінен быць членам Англіканскай Царквы, а кожны з нашчадкаў прастола павінен
адмовіцца ад магчымасці ўступлення ў шлюб з католікам або каталічкай.
Між тым
Англіканская Царква выступіла рашуча супраць змены гэтага закона, выказаўшы асцярогу,
што, калі які-небудзь спадчыннік прастола ўступіць у шлюб з прадстаўніком Каталіцкага
Касцёла, то іх дзеці, паводле Кананічнага права, павінны будуць выхоўвацца ў каталіцкай
веры, што, на думку англіканскіх іерархаў, прывядзе да цяжкавырашальнай сітуацыі,
калі ў рэшце рэшт манархам а, такім чынам, і кіраўніком Англіканскай Царквы стане
католік.
Па словах прадстаўніка Царквы, нягледзячы на тое, што закон аб атрыманні
пасады ў спадчыну ў сучасным свеце здаецца "няправільным", англіканства застаецца
дзяржаўнай рэлігіяй, а значыць, брытанскі манарх, які з'яўляецца адначасова і кіраўніком
Царквы, ніяк не можа падпарадкоўвацца Ватыкану.
Між тым, у Брытаніі няма забароны
на ўступленне членаў каралеўскай сям'і ў шлюб з мусульманамі, юдэямі і нават з адкрытымі
агностыкамі і атэістамі.