Papa bekon mbarë njerëzimin, duke uruar që Krishti i ngjallur të hapë udhën e lirisë,
të drejtësisë e të paqes!
Rreth njëqind mijë besimtarë morën pjesë sot paradite në Meshën e kryesuar nga Papa
në Sheshin e Shën Pjetrit, me rastin e Pashkëve. Krishti i ngjallur – kjo ishte lutja
e Papës, hapët udhën e lirisë, të drejtësisë e të paqes në mbarë botën. Në mesditë,
Benedikti XVI doli në lozhën qëndrore të Bazilikës së Vatikanit për Mesazhin e Pashkëve
Urbi et Orbi, drejtuar Romës e Botës, duke u uruar Pashkët mbarë popujve të Planetit,
në të gjitha gjuhët kryesore.
“Krishti u ngjall! Që prej dymijë vjetësh
vijon të jehojë ky kumtim, që e ndryshoi rrjedhën e historisë. Mijëra lule, dhuruar
me këtë rast nga Holanda, e kishin shndërruar Sheshin e Shën Pjetrit në një kopsht
të harlisur, në gji të pranverës, me një harmoni mahnitëse ngjyrash. Mbarë gjithësia
galdon, brohoriti Papa, e përfshirë në pranverën e njerëzimit, e shpërblyer nga flijimi
i Krishtit. E mijëra trëndafilat, tulipanët, zëmbakët, zymbylat e lulet e tjera, dukej
sikur i ripohonin fjalët Atit të Shenjtë, duke u kujtuar të gjithëve bukurinë e së
tërës, pasuruar me larmi ngjyrash. Sivjet Pashkët katolike e ortodokse u kremtuan
në të njëjtën datë. Prandaj, pas shpalljes së Ungjillit, një kor ortodoks këndoi para
Benediktit XVI himin bizantin të Pashkëve. Pas Meshës, Papa u duk në
lozhën qëndrore të Bazilikës së Vatikanit për mesazhin e Solemnitetit dhe Bekimin
Urbi et Orbi, drejtuar Romës e Botës. Akoma sot, pohoi Ati i Shenjtë, në epokën tonë
të komunikimeve ultrateknologjike – feja e të krishterëve bazohet mbi dëshminë e atyre,
që e panë Krishtin e ngjallur: “Ngjallja e Krishtit nuk është fryt i ndonjë
spekulimi, i ndonjë përvoje mistike. Është ngjarje që, natyrisht, i kapërcen caqet
e historisë, por që ndodh në një çast të mirëpërcaktuar të historisë e lë në të gjurmë
të pashlyeshme. Drita, që i verboi rojet e vendosura pranë varrit të Jezusit, për
ta ruajtur, përshkoi kohë e hapësirë. Nuk është çfarëdolloj drite: është dritë hyjnore,
që e davariti errësirën e vdekjes e solli në botë shkëlqimin e Zotit, shkëlqimin e
së Vërtetës, të së Mirës”. Ngjallja e Krishtit i jep forcë e kuptim çdo shprese
njerëzore, çdo pritjeje. Në qiell mbretëron paqja e hareja! Por, për fat të keq,
në tokë nuk është kështu, kujtoi Ati i Shenjtë. Këtu, në këtë botën tonë, Aleluja
e Pashkëve është në kontrast me vajtimet e britmat, pasojë e situatave të shumta,
të dhimbshme, të mjerimit, urisë, luftërave, dhunës. E pra pikërisht për këtë vdiq
e u ngjall Krishti! “Prandaj mesazhi im dëshiron të arrijë tek të gjithë e,
si kumtim profetik, sidomos tek popujt dhe bashkësitë, që po vuajnë sot orën e mundimeve.
Uroj që Krishti t’u hapë udhën e lirisë, të drejtësisë e të paqes”. Benedikti
XVI u lut për pajtim në mbarë botën, posaçërisht për Tokën e Shenjtë, për Lindjen
e Mesme e Bregun e Fildishtë, që drita e paqes dhe e dinjitetit njerëzor të fitojë
mbi errësirën e përçarjeve, të urrejtjes, të dhunës. Për Libinë, uroi që në vend të
vringëllimit të armëve, të fitojnë diplomacia e dialogu e, në këtë situatë konflikti,
të krijohen mundësitë për arritjen e ndihmave humanitare tek njerëzit, që vuajnë pasojat
e ndeshjes: “Në vendet e Afrikës Veriore e të Lindjes së Mesme, uroj që të
gjithë qytetarët, e në veçanti të rinjtë, të përpiqen për të mirën e përbashkët, për
të ndërtuar një shoqëri, që e mund varfërinë e kërkon rrugëzgjidhje politike, të frymëzuara
nga respekti për njeriun”. Kërkoi, në vijim, që refugjatëve të shumtë, ardhur
nga vendet e ndryshme afrikane, të mos u mungojë solidariteti i përgjithshëm: “Njerëzit
vullnetmirë, të ndriçohen për t’ua hapur zemrën, për t’i mikpritur, për t’iu përgjigjur
në mënyrë solidare e të njëzëshme nevojave të ngutshme të shumë vëllezërve. Ngushëllimi
e vlerësimi im t’i nxisë edhe më shumë, të gjithë ata, që bëjnë përpjekje bujare e
japin dëshmi shembullore në këtë drejtim”. Papa iu lut Zotit t’i japë ngushëllim
e shpresë Japonisë, së shkatërruar nga tërmeti e tsunami, si dhe vendeve, që muajt
e fundit vuajtën nga fatkeqësitë e natyrës, të cilat mbollën dhimbje e ankth. Kujtoi
me dashuri të thellë të krishterët e persekutuar për shkak të besimit të tyre në
Zotin e ngjallur, duke uruar…: “Kumtimi i ngjalljes së tij fitimtare i mbushtë
plot me guxim e shpresë!” Ati i Shenjtë i ftoi të gjithë ta ndjekin pas Jezusin,
në këtë botë të plagosur, duke kënduar Aleluja: “Në zemrën tonë ka gëzim e dhimbje;
në fytyrë, gaz e lot. Kështu është jeta tokësore. Po Krishti u ngjall, jeton e ecën
me ne. Prandaj këndojmë e ecim, besnikë të impenjimit tonë në këtë botë, me sytë
drejtuar kah Qielli!”. Pas mesazhit, urimet e Pashkëve në 65 gjuhë të ndryshme.
E dhe urimi drejtuar popullit shqiptar, me të cilin hapëm programin tonë të solemnitetit
të madh të ngjalljes së Krishtit: Për shumë vjet Pashkët!