Të dashur vëllezër e motra të Romës e të mbarë botës, Agimi i Pashkëve na solli
përsëri kumtin e lashtë, e gjithnjë të ri: “Krishti u ngjall!”. Jehona e kësaj ngjarjeje,
nisur nga Jeruzalemi njëzet shekuj më parë, vijon të jehojë në Kishën, që mbart në
zemër fenë prekëse të Marisë, Nënës së Krishtit, fenë e Magdalenës e të grave të tjera,
që e panë të parat varrin e zbrazët, fenë e Pjetrit dhe të Apostujve të tjerë. Deri
më sot, e edhe në epokën tonë të komunikimeve ultrateknologjike – feja e të krishterëve
bazohet mbi këtë kumtim, mbi dëshminë e këtyre motrave e të këtyre vëllezërve, që
e panë të parët gurin e flakur nga gryka e gropës e varrin e zbrazët; e panë edhe
lajmëtarët misteriozë, të cilët pohuan se Jezusi, i Kryqëzuari, ishte ngjallur; ishte
Ai vetë, Mësuesi e Zoti, i gjallë e i prekshëm. Ishte Ai, që iu duk Marisë nga Magdala,
dy dishepujve të Emausit e, së fundi, të njëmbëdhjetëve, mbledhur së bashku në Çenakull
(cfr Mk 16,9-14). Ngjallja e Krishtit nuk është fryt i ndonjë spekulimi, i
ndonjë përvoje mistike. Është ngjarje që, natyrisht, i kapërcen caqet e historisë,
por që ndodh në një çast të mirëpërcaktuar të historisë e lë në të gjurmë të pashlyeshme.
Drita, që i verboi rojet e vendosura pranë varrit të Jezusit, për ta ruajtur, përshkoi
kohë e hapësirë. Nuk është çfarëdolloj drite: është dritë hyjnore, që e davariti errësirën
e vdekjes e solli në botë shkëlqimin e Zotit, shkëlqimin e së Vërtetës, të së Mirës. Ashtu
si nën rrezet e diellit në pranverë, mugullon sythi i ri mbi degët e pemëve, kështu
rrezatimi, që buron nga ngjallja e Krishtit i jep forcë e kuptim çdo shprese njerëzore,
çdo pritjeje, çdo dëshire e çdo plani. Prandaj sot mbarë gjithësia galdon, e përfshirë
në pranverën e njerëzimit, e këndon himnin e heshtur të lavdërimit të Krijesës. Alelujën
e Pashkëve. Jehon Aleluja në Kishën shtegtare në botë, shpreh ngazëllimin e heshtur
të universit e, sidomos, etjen e çdo shpirti njerëzor, që kërkon Zotin e i shpreh
mirënjohjen për mirësinë, bukurinë e vërtetësinë e tij të pafundme.
“Në ngjalljen
tënde, o Krisht, gazmojnë qiell e tokë. Kësaj ftese për të kënduar himne lavdërimi,
që lartohen sot nga zemra e Kishës, “qiejtë” i përgjigjen plotësisht: aradhet e engjëjve,
të shenjtorëve e të të Lumëve bashkojnë zërat me këngën tonë ngadhënjyese. Në qiell
mbretëron paqja e hareja! Por, për fat të keq, në tokë nuk është kështu! Këtu, në
këtë botën tonë, Aleluja e Pashkëve është në kontrast me vajtimet e britmat, pasojë
e situatave të shumta, të dhimbshme, të mjerimit, urisë, luftërave, dhunës. E pra
pikërisht për këtë vdiq e u ngjall Krishti! Vdiq edhe për shkak të mëkateve të sotme,
e u ngjall edhe për shpëblimin e historisë sonë, të sotme! Prandaj mesazhi im dëshiron
të arrijë tek të gjithë e, si kumtim profetik, sidomos tek popujt dhe bashkësitë,
që po vuajnë sot orën e mundimeve. Uroj që Krishti t’u hapë udhën e lirisë, të drejtësisë
e të paqes. Të galdojë Toka, që e para rrezëlloi nga Drita e të Ngjallurit. Shkëlqimi
i Krishtit i ndriçoftë popujt e Lindjes së Mesme, që drita e paqes dhe e dinjitetit
njerëzor të fitojë mbi errësirën e përçarjeve, të urrejtjes, të dhunës. Uroj që
në Libi, në vend të vringëllimit të armëve, të fitojnë diplomacia e dialogu e, në
këtë situatë konflikti, të krijohen mundësitë për arritjen e ndihmave humanitare tek
njerëzit, që vuajnë pasojat e ndeshjes. Uroj që në vendet e Afrikës Veriore e
të Lindjes së Mesme, të gjithë qytetarët, e në veçanti të rinjtë, të përpiqen për
të mirën e përbashkët, për të ndërtuar një shoqëri, që e mund varfërinë e kërkon rrugëzgjidhje
politike, të frymëzuara nga respekti për njeriun. Refugjatëve të shumtë, që ravgojnë
nga vendet afrikane e detyrohen të largohen nga viset më të dashura, u uroj solidaritet
të përgjithshëm. Njerëzve vullnetmirë, t’ua hapin zemrën, t’i mikpresin, t’u përgjigjen
në mënyrë solidare e të njëzëshme nevojave të ngutshme të shumë vëllezërve. E uroj
që ngushëllimi e vlerësimi im t’i nxisë edhe më shumë, të gjithë ata, që bëjnë përpjekje
bujare e japin dëshmi shembullore në këtë drejtim. Popujve të Bregut të Fildishtë,
vend ku ndjehet nevoja urgjente e rifillimit të udhës së pajtimit e të faljes, për
të mjekuar plagët e thella, ndërsa përballojnë pasojat dramatike të shkaktuara nga
dhuna e kohëve të fundit, u uroj ta përtërijnë bashkëjetesën civile. I uroj ngushëllim
e shpresë tokës së Japonisë, në sa përballon pasojat dramatike të tërmetit të fundit.
Ashtu dhe vendeve, të cilët muajt e fundit vuajtën nga fatkeqësitë e natyrës, që mbollën
dhimbje e ankth. Të galdojnë qielli e toka për dëshminë e të gjithë atyre, që përballojnë
kundërshtime e persekutime për shkak të besimit në Krishtin Zot. Kumtimi i ngjalljes
së tij fitimtare i mbushtë plot me guxim e shpresë!
Të dashur vëllezër e motra!
Krishti i ngjallur ecën para nesh drejt qiellit të ri e tokës së re (cfr Ap 21,
1) ku, më në fund, do të jetojmë të gjithë, si një familje e vetme, si bij të
të njëjtit Atë. Ai është me ne deri në fund të fundit të kohëve. Të ecim pas Tij në
këtë botë të plagosur, duke kënduar Aleluja! Në zemrën tonë ka gëzim e dhimbje; në
fytyrë, gaz e lot. Kështu është jeta tokësore. Po Krishti u ngjall, jeton e ecën
me ne. Prandaj këndojmë e ecim, besnikë të impenjimit tonë në këtë botë, me sytë
drejtuar kah Qielli!