Ватыканскія музеі перададуць твор Караваджа ў Мадрыд
З нагоды Сусветных
дзён моладзі, якія пройдуць 15-20 жніўня ў Мадрыдзе, Ватыканскія музеі перадалі для
часовага экспанавання музею “Прада” карціну Караваджа “Палажэнне ў грабніцу”. Гэты
твор, які паўстаў на пачатку XVII ст., дапоўніць выставу выяваў Хрыста, якая адкрыецца
ў іспанскім нацыянальным музеі ў чэрвені гэтага года. Выстава з’яўляецца адным з элементаў
культурнай праграмы Сусветных дзён моладзі.
Яшчэ адна выстава мастацкіх твораў
на рэлігійную тэматыку пройдзе ў мадрыдскім музеі Цісэна-Барнэмісы. Яна называецца
“Спатканне” і на ёй будуць прадстаўлены выявы Хрыста падчас сустрэч з рознымі людзьмі.
Уваход на гэтыя выставы падчас моладзевага форума будзе вольны. Акрамя таго,
удзельнікі гэтага мерапрыемства змогуць свабодна наведаць рэзідэнцыю іспанскай каралеўскай
сям’і.