Каля 50 тыс. хрысціян
знаходзяцца ў турмах Паўночнай Карэі за свае рэлігійныя перакананні, перадае агенцтва
“Fides”. Паводле дакладу спецыяльнага назіральніка ААН па правах чалавека ў Паўночнай
Карэі Марзукі Друсман, прадстаўленаму нядаўна ў Савеце ААН па правах чалавека ў Жэневе,
юрыдычная сістэма ў дзяржаве цалкам залежная ад рэжыму. Акрамя звычайных судоў існуе
“паралельная юрыдычная сістэма”, якая цалкам не выконвае працэсуальныя правы абвінавачваных
і мае на мэце ажыццяўленне кантролю над грамадзянамі.
“Паралельная юрыдычная
сістэма складаецца з шэрагу мер і органаў, якія накіраваны на кантроль грамадзян.
Гэта ў прыватнасці: “Закон аб кантролі за нацыянальнай бяспекай” і “Судовы камітэт
паплечнікаў”, свайго роду народны суд, які дзейнічае на аснове ідэалагічных установак
і кантралюе “сацыялістычную законнасць” працэсу і выносіць прысуды за эканамічныя
і сацыяльныя злачынства. Таксама існуе “Камітэт бяспекі, які ажыццяўляе нагляд за
выкананнем судовых прысудаў”.
Карэйцы ці замежныя грамадзяне, якія падвергліся
падобнаму суду, адпраўляюцца ў турэмныя лагеры, дзе падвяргаюцца рэгулярным катаванням
і жорсткаму абыходжанню. Палітычныя дысідэнты і члены іх сем'яў часта прысуджаюцца
да пажыццёвага зняволення ў працоўных лагерах. Сярод іх нямала зняволеных, якія адбываюць
тэрмін за рэлігійныя перакананні.
Свабода рэлігіі і сумлення ў Паўночнай Карэі
цалкам адсутнічае, таксама як і права на сходы, перакананні і свабодныя выказванні,
адзначае “Fides”. Паводле сведчанняў людзей, якія збеглі з краіны, улада працягвае
інтэнсіўную антырэлігійную прапаганду і забараняе рэлігійную дзейнасць.
“Чучхе”
з'яўляецца афіцыйнай ідэалогіяй і адзінай сістэмай думкі і перакананняў, якая дапускаецца
ў Паўночнай Карэі. У КНДР “чучхе” падаецца ў якасці гарманічнай трансфармацыі ідэй
марксізму-ленінізму на аснове старажытна-карэйскай філасофскай думкі. Упершыню гэты
тэрмін прагучаў у прамове Кім Ір Сена ў 1955 г.
Нягледзячы на складаную сітуацыю,
па некаторых звестках, у Паўночнай Карэі сёння застаецца каля 400 тыс. чалавек (2%
насельніцтва краіны), якія лічаць сябе хрысціянамі.