Айцец Канталамеса: змагацца са структурамі, якія спрыяюць з’яўленню беднасці
15 красавіка ў Ватыканскай
капліцы “Redemptoris mater” (“Маці Адкупіцеля”) айцец Раньера Канталамеса прамовіў
да Бэнэдыкта XVI і супрацоўнікаў Рымскай Курыі сваё чацвёртае, заключнае велікапостнае
казанне. Прапаведнік Папскага дома закрануў тэму сацыяльнай рэлевантнасці Евангелля:
“сапраўды - сказаў айцец Канталамеса - хрысціянская любоў павінна быць дзейснай, павінна
уцелаўляцца ў канкрэтныя ўчынкі любові, якія, як кажа Езус – складаюць аснову Апошняга
суда”.
“Сучасная эпоха, пачынаючы з ХІХ ст., стала зваротным момантам, калі
вельмі востра стала сацыяльнае пытанне. - сказаў айцец Канталамеса - Цяпер нам зразумела,
што не дастаткова толькі клопату аб бедных і прыгнечаных, але трэба яшчэ змагацца
са структурамі, якія спрыяюць іх з’яўленню. Як адказ на гэту праблему нарадзілася
сацыяльнае навучанне Касцёла”.
“Евангелле не прапаноўвае прамых вырашэнняў
сацыяльных праблем, але змяшчае ў сабе прынцыпы, якія даюць магчымасць распрацаваць
адказы на пытанні розных гістарычных сітуацый. - сказаў прапаведнік Папскага дома
- Менавіта таму, што сітуацыі і сацыяльныя праблемы змяняюцца ў залежнасці ад эпохі,
хрысціянін пакліканы быць здольным прымяняць евангельскія прынцыпы ў кожнай складанай
сітуацыі”. На заканчэнне свайго казання айцец Раньера Канталамеса адзначыў, што “сацыяльныя
энцыклікі Пантыфікаў працягваюць адна адну і ўтрымліваюць адказы на новыя пытанні
грамадства”.