U paraqit, në Vatikan, “YouCat”, doracaku i katekizmit për Ditën Botërore të Rinisë
të Madridit.
Në Sallën e Shtypit të Vatikanit, u paraqit dje “YouCat”, doracaku i Katekizmit të
Kishës Katolike për të rinjtë, që do të marrin pjesë në Ditën Botërore të Rinisë
të këtij viti në Madrid. Një kopje e “YouCat” iu dorëzua Papës nga një grup të rinjsh,
në përfundim të audiencës së djeshme të përgjithshme mbajtur në Vatikan. Në konferencën
e shtypit, ndërmjet të tjerëve, folën kardinali Stanisalo Rilko, kryetar i Këshillit
Papnor për Laikët; kardinali Kristof Shënborn, kryeipeshkëv i Vjenës; kryeipeshkvi
Rino Fizikela, kryetar i Këshillit Papnor për Ungjillëzimin e Ri. Është një ndihmesë
e re, me vlerë, për ta fuqizuar gjithnjë më shumë fenë e të rinjve: ky është qëllimi
i “YouCat”, hartuar në formën e 527 pyetjeve e përgjigjeve, përkthyer në gjashtë gjuhët
zyrtare të DBR-së. Gjatë këtij viti do të përkthehet edhe në gjuhë të tjera e do të
shpërndahet në 700 mijë kopje, në takimin e madh të Madridit. Kardinali Rilko
nënvizoi se nuk mund ta zëvendësojë Katekizmin e madh, ndonëse në përkim të plotë
me të e me një gjuhë të përshtatshme për të rinjtë. Për kardinalin polak, kjo ndihmesë
i hap rrugën njohjes së plotë me Katekizmin e Kishës Katolike: “T’i edukosh
të rinjtë ta studiojnë me impenjim YouCat, është detyrë themelore, për t’i ndihmuar
ta kuptojnë se feja nuk është frymëzim subjektiv, as ndjenjë e thjeshtë fetare e as
ideologji, por metodë për të njohur të vërtetën, takim me një ngjarje, me një Person
të gjallë, që quhet Jezu Krisht”. Kardinali Shënborn vuri theksin mbi
sfidën e realizimit të një teksti katekizmi, fryt i bashkëpunimit të të rinjve me
teologët, që t’u përgjigjet plotësisht kërkesave të botës rinore: “Është bërë një
aventurë e pabesueshme, e është mrekulli që sot, në duart tuaja keni një katekizëm
për të rinjtë, besnik i Katekizmit të Kishës Katolike por që, megjithatë shprehet
me një gjuhë të zgjedhur fjalë për fjalë, pyetje për pyetje, gjuhë, për të cilën u
punua dy vera me radhë”. Në diskutimin e tij, kryeipeshkvi Rino Fizikela vërejti
se katekizmi sot është themelor për jetën e breznive të reja, që kanë shpesh formim
kulturor fragmentar, gjë që i pengon të krijonë një vizion unitar të jetës. U ndalua,
pastaj, tek vlerat e “YouCat”: “'YouCat' nuk është vetëm një ndërmjetësim i
shkëlqyer drejt Katekizimit të Kishës Katolike. I përgjigjet edhe një kërkese të së
sotmes, që duhet të dijë t’ua paraqesë të rinjve pasurinë e fesë, të cilën të krishterët
e praktikojnë në çdo kohë e në çdo vend, me një gjuhë të thjeshtë, të plotë e sidomos,
të kuptueshme”. E, kujdes përkthimin! Duke iu përgjigjur pyetjeve të gazetarëve,
kardinali i Vjenës shpjegoi se në tekstin e përkthyer gjermanisht, ka disa pasaktësi,
sidomos atje ku flitet për metodat e parandalimit të shtatzënisë e për eutanazinë.
Prandaj, Kongregata e Vatikanit për Doktrinën e Fesë do të formojë një grup studimi,
që do të punojë për korrigjimin e gabimeve në tekstet e përkthyera në gjuhë të ndryshme.