Նալբանդեանի Հանդիպումը ՄԻՆՍՔ-ի Խմբակի Համանախագահներուն Հետ։
Ապրիլ 11ին Երեւան ժամանեցին Եւրոպայի մէջ անվտանգութեան եւ համագործակցութեան կազմակերպութեան (ԵԱՀԿ) Մինսկի խումբի համանախագահներ Ռապըրթ Պրատքին (ԱՄՆ), Պեռնար Ֆա-սիէն (Ֆրանսա) եւ Իկոր Փոփովը (Ռուսիա):
Համանախագահները այսօր պիտի մեկնին Լեռնային Ղարաբաղ, ուր հանդիպումներ պիտի ունենան Արցախի Պետութեան ղեկավարներուն հետ: Ապա, համանախագահները Ատրպէյճան պիտի մտնեն ազատագրուած տարածքներէն՝ Աղտամէն անցնելով Բարդա:
Նշենք, որ ԵԱՀԿ-ի մամլոյ ծառայութիւնը նախապէս յայտնած էր, որ համանախագահներու այցին նպատակն է քննարկումները շարունակել հիմնական սկզբունքներու հիման վրայ՝ յենուելով Սոչիի հանդիպման արձանագրած դրական տեղաշարժին վրայ:
Երեւանի մէջ, երէկ, համանախագահները տեսակցեցան Հայաստանի արտաքին գործոց նախարար Էդուարդ Նալբանդեանի հետ եւ անոր հետ քննարկեցին Արցախեան հիմնախնդիրի կարգաւորման ներկայ փուլին առնչուող շարք մը հարցեր:
| All the contents on this site are copyrighted ©. |