“Захаваем вечныя каштоўнасці” - пікет у цэнтры Мінска
9 красавіка на праспекце
Пераможцаў у Мінску па ініцыятыве групы праваслаўных вернікаў адбыўся пікет пад дэвізам
“Захаваем вечныя каштоўнасці”. Удзельнікі акцыі паставілі сваёй мэтай звярнуць увагу
грамадскасці на з'явы сучаснага жыцця, якія пагражаюць развіццю асобы і чалавечай
супольнасці, вядуць да іх дэградацыі. Гэта перш за ўсё: аборты, сужэнская нявернасць,
так званыя грамадзянскія і аднаполыя саюзы, а таксама культ грошай. Арганізатары асабліва
падкэслівалі “недапушчальнасць падмены паняццяў “бацька” і “маці” на “бацька нумар
адзін” і “бацька нумар два”, што ўжо стала рэальнасцю ў некаторых краінах Еўропы.
Удзельнікі пікету выказаліся за традыцыйную сям'ю, адказнае бацькоўства і мацярынства,
за шматдзетныя сям'і, любоў і цноту.
У мерапрыемстве ўдзельнічалі: члены Усебеларускага
аб'яднання казацтва, прадстаўнікі грамадскіх аб'яднанняў, вернікі мінскіх праваслаўных
прыходаў, а таксама людзі неабыякавыя да духоўна-маральнага стану і будучыні беларускага
грамадства. Адзін з іх Сяргей Кірпіч, лічыць, што таксама не можна замоўчваць праблему
штучнага апладнення. “Рэпрадуктыўныя тэхналогіі ніколі не прывядуць да дабра. Усё
што створана Богам, усё тое, што мае натуральную прыроду – не павінна відазмяняцца,
паколькі адмова натуральнага шляху рэчаў прыводзіць да падзення нораваў і дэградацыі
грамадства” - заявіў ён.
На транспарантах, падрыхтаваных удзельнікамі, можна
было прачытаць наступнае: "Жыві для Вечнасці, чалавек”, “Беларусь не Садом і Гамора”,
“Грамадзянскія шлюбы – гэта безадказнасць, аборты – гэта грэх”, “Мы за Беларусь светлую
і моцную”. “Мэта нашага жыцця – гэта пазбаўленне ад зла, якое існуе ўнутры нас шляхам
працы над сабой, каб падымацца над сваімі спакусамі, каб ачышчацца”, - падкрэсліў
Сяргей Кірпіч.
Акцыю па меркаванні ўдзельнікаў можна лічыць паспяховай, бо
яна выклікала ўвагу з боку гараджан. Грамадства павінна адчуваць, што існуюць пэўныя
нязменныя прынцыпы і ёсць людзі, якія іх адстойваюць. Па словах арганізатараў падобныя
акцыі будуць працягнуты.