Парламенцкая асамблея
Савета Еўропы на сваім наступным пасяджэнні абмяркуе: "Рэлігійнае вымярэнне міжкультурнага
дыялогу". На яго былі запрошаны высокапастаўленыя прадстаўнікі хрысціянскіх цэркваў,
юдаізму і ісламу. Ад імя Каталіцкага Касцёла на форуме выступіць старшыня Папскай
рады па міжрэлігійным дыялогу, кардынал Жан-Луі Таран.
Дэбаты па дыялогу паміж
рэлігіямі і культурамі, якія пройдуць 12 красавіка, будуць адным з асноўных пунктаў
пасяджэння, якое адбудзецца ў Страсбургу 11-15 красавіка. Разам з прадстаўніком Святога
Пасаду у іх возьмуць удзел: глава Румынскай Праваслаўнай Царквы Патрыярх Данііл, прэлат
Бернард Фельмберг з Рады евангельскіх цэркваў Германіі, галоўны рабін Расіі Берл Лазар
і старшыня Упраўлення па справах рэлігіі Турцыі прафесар Мехмет Гёрмез.
Да
пачатку сесіі Камітэт Савета Еўропы па культуры, навуцы і адукацыі прадставіў ўсёабдымны
даклад, у якім прапанаваў развіццё партнёрства паміж Саветам, рэлігійнымі супольнасцямі
і гуманітарнымі арганізацыямі, каб такім чынам умацаваць міжкультурны дыялог, а з
цягам часу стварыць пастаянны форум для дыялогу.
Савет Еўропы з'яўляецца міжнароднай
урадавай арганізацыяй, якая аб'ядноўвае амаль усе краіны Еўропы і шэраг краін з іншых
рэгіёнаў свету, такіх як Арменія і Азербайджан. Яго асноўнай мэтай з'яўляецца "дасягненне
большага адзінства паміж яго членамі для абароны і ажыццяўлення ідэалаў і прынцыпаў,
якія з'яўляюцца іх агульным набыткам, і садзейнічанне іх эканамічнаму і сацыяльнаму
прагрэсу" (арт.1 Статута Савета Еўропы). Дзейнасць арганізацыі сканцэнтравана галоўным
чынам на прапагандаванні і абароне правоў чалавека, дэмакратыі і супрацоўніцтве дзяржаў-членаў
у галіне культуры.