Базыліка св. Пятра: цела папы Інакенція XI перанесена з капліцы св. Себасцьяна
Кіраўнік Залі Друку
Апостальскай Сталіцы кс. Фэдэрыка Ламбардзі паведаміў сёння, што 8 красавіка ў 19.00
гадзін у базыліцы св. Пятра, пасля яе закрыцця, адбылося перанясенне цела благаслаўлёнага
папы Інакенція XI з прасторы пад алтаром капліцы св. Себасцьяна ў спецыяльна падрыхтаванае
месца пад алтаром Перамянення ватыканскай базылікі, які знаходзіцца ў канцы левага
нефа, у задняй частцы пілястра св. Андрэя.
Цырымонію ўзначаліў кардынал Анджэла
Камастры ў суправаджэнні біскупа Віторыё Ланцані і арцыбіскупа Джузэпэ Дэ Андрэа,
а таксама іншых членаў Капітулы св. Пятра. Урна з парэшткамі папы Інакенція XI была
вынята з алтара св. Себасцьяна і ў працэсіі са спевам Літаніі да ўсіх святых перанесена
ў алтар Перамянення Пана, дзе была змешчана ў новае месца, спецыяльна забяспечанае
кратамі, паведаміў кс. Ламбардзі.
Цырымонія завяршылася малітвай і благаслаўленнем,
якое ўдзяліў кардынал Камастры. Быў прачытаны і падпісаны адмысловы Акт аб перанясенні
цела Папы.
У капліцы св. Себасцьяна, дзе нядаўна былі завершаны рэстаўрацыйныя
працы і была адноўлена сістэмы асвятлення і гуку, у прасторы пад алтаром будзе змешчана
цела Яна Паўла ІІ пасля беатыфікацыі Слугі Божага.