Ipeshkvijtë e Polonisë u drejtojnë besimtarëve një Letër baritore, kushtuar Gjon Palit
II, në prag të lumnimit.
“Urojmë që i lumi Gjon Pali II të bëhet prijësi ynë shpirtëror në rrugët e lirisë,
të bashkimit e të solidaritetit”. Kështu shkruajnë ipeshkvijtë polakë, duke e shprehur
këtë dëshirë në Letrën baritore, shkruar me rastin e kremtimit të 1 majit, kur Papa
Vojtila do të lartohet në nderimet e elterit. Prelatët – njofton agjensia Sir – shprehin
bindjen se lumnimi i Gjon Palit II hap perspektiva të reja për të ardhmen, duke i
nxitur të gjithë ta lexojnë në mënyrë më të vëmendshme e më krijuese trashëgiminë
e tij, të shprehur me fjalët, me personalitetin, me stilin e jetës, me shërbimin,
që i bëri mbarë njerëzimit. Ipeshkvijtë urojnë edhe që shembulli i Gjon Pali II të
ndihmojë për të përballuar sfidat e reja, duke frymëzuar si jetën private, ashtu edhe
atë shoqërore. Episkopati polak është i vetëdijshëm se dhurata e jetës dhe e shërbimit
të Gjon Palit II e ka pasuruar në mënyrë të ndjeshme jetën e Kishës e të botës. Ne
vetë, në vendin tonë – kujtojnë - e në pjesën tonë të Evropës, i jetuam ndryshimet
epokale, të frymëzuara nga vizioni i Gjon Palit për një botë të re, parë si familje
e përbashkët e popujve. Ne, që jetuam të lidhur me zinxhirë, që vuajtëm nën një sistem,
i cili shtypi nën thundrën e tij të hekurt popuj të tërë, sistem totalitar e i pa
Zot, e kuptojmë edhe më mirë impenjimin e Gjon Palit II për t’u kthyer lirinë e humbur
popujve të një pjese të mirë të botës. Dhurata e lumnimit, për të cilën prelatët
falënderojnë Benediktin XVI, është impenjative, kërkon përgjigje. Ipeshkvijtë mendojnë
se lumnimi i Papës Vojtila duhet të ndikojë fuqimisht edhe mbi jetën publike. Në Letër,
episkopati shpreh shqetësimet lidhur me cilësinë dhe stilin e jetës politike në Poloni,
duke vënë theksin mbi përçarjet shkandulluese ndërmjet njerëzve e partive të ndryshme
të cilat, megjithatë, nuk ngurrojnë t’u kujtojnë bashkatdhetarëve, vlerat e krishtera.
Vlera që e përjashtojnë plotësisht grindjen e përçarjen, vlera nga të cilat buron
ftesa drejtuar mbarë njerëzve, që të bashkohen, të duhen, të kërkojnë falje e të
falin. Sipas prelatëve, sjellje të tilla, që karakterizohen nga mllefet e vazhdueshme,
nga armiqësitë e rrezikshme, nga qëndrimet e njëanshme e nga mungesa e plotë e respektit
për opinionet e tjetrit, çojnë në humbjen e kotë të energjive, të cilat do të ishte
mirë të përdoreshin për të zgjidhur jo sherret ndërmjet personave që sundojnë e të
partive, që kryesojnë, por problemet më të mprehta, që kanë të bëjnë me jetën e mbarë
shoqërisë. Ipeshkvijtë i kërkojnë botës politike t’i shmangë grindjet shterpe,
duke uruar që të vënë në themel të programeve të tyre, faljen e pajtimin, për të mirën
e përbashkët, e jo për atë vetjake. Por, si barinj, pohojnë se nuk e kanë ndër mend
të mjaftohen vetëm me thirrje drejtuar të tjerëve, të vetëdijshëm se përçarjet shqetësuese
në gjirin e shoqërisë kërkojnë nga të gjithë, edhe nga ata vetë, kthesën e madhe të
zemrave. E dimë - shkruajnë ipeshkvijtë – se duhet të japim shembullin personal,
se duhet ta jetojmë, atë që e predikojmë e duhet të ecim besnikërisht në gjurmët
e të Lumit Gjon Pali II.