Լիպիայի Մէջ ՕԹԱՆ-ի Ուժեր Սխալմամբ 45 Ըմբոստներ Կը Սպաննեն ։
Լիպիացի ըմբոստները կը յայտնեն, որ ՕԹԱՆ-ի օդային մէկ սխալ հարուածը երէկ 45 ըմբոստներու
մահուան պատճառ եղած է : Ասիկա մէկ շաբթուան ընթացքին ՕԹԱՆ-ի ուժերուն կողմէ ակներեւ
երկրորդ նման սխալն է, որ յաւելեալ զայրոյթ յառաջացուցած է դաշնակից ուժերուն հետ համակարգումի
թերացումներուն նկատմամբ: Յարձակումը տեղի ունեցաւ քարիւղի ռազմավարական Պրիքա նաւահանգիստի
մօտ: Հետագային հարիւրաւոր ինքնաշարժներ Աժտապիայէն -Պենկազի փախուստ տուին` մեկնելով
այն մտավախութենէն, թէ Մոամմար Կէտտաֆիի ուժերը կրնան ստեղծուած իրարանցումէն օգտուելով
յառաջանալ դէպի Աժտապիա: Պրիւքսելի մէջ ՕԹԱՆ-ի պաշտօնատար մը յայտնեց, որ ըմբոստներուն
վարկածին շուրջ հետաքննութիւն տեղի պիտի ունենայ: Յարձակումը տեղի ունեցաւ Պրիքայէն 30
քիլոմեթր հեռաւորութեան վրայ: Միւս կողմէ, Ուաշինկթըն յայտնեց, որ ըմբոստները պէտք
չէ զինել, մինչեւ որ անոնց ինքնութեան շուրջ անորոշութիւնը չյստականայ ։