"Любоў гэта не выдумка" - трэццяе вялікапостнае казанне айца Раньера Канталамесы
8 красавіка папа Бэнэдыкт
XVI разам з супрацоўнікамі Рымскай курыі выслухалі трэццяе вялікапостнае казанне айца
Раньера Канталамесы, прапаведніка Папскага дома. Сённяшняе разважанне айца Канталамесы
назавалася “Любоў гэта не выдумка”.
Напачатку свайго казання айцец Канталамеса
задаўся пытаннем: як атрымоўваецца, што з ракі Іардан утвараюцца два мора – Галілейскае,
поўнае рыбы і іншых жывых стварэнняў і Мёртвае, у якім ёсць толькі соль? “Часткова
адказаць на гэтае пытанне можна заўважыўшы, што вада з Іардана, якая трапляе ў Галілейскае
мора, не затрымліваецца ў ім, але пітае ўсе навакольныя землі. Мёртвае мора насупраць,
атрымлівае ваду, але з яго не выходзіць ні кроплі. Гэта вельмі сімвалічна. Мы не можам
абмежавацца толькі тым, што атрымліваем любоў, але павінны таксама дарыць яе. Вада,
якуе нам дае Езус, павінна стацца ў нас “жывым фантанам”, - сказаў прапаведнік Папскага
дома.
Айцец Канталамеса звярнуў увагу на тое, што запаведзь любіць бліжняга
прысутнічала яшчэ ў Старым Запавеце, аднак Езус называў яе “сваёй” запаведзю, “новай
запаведзю”. “Чаму? Справа ў тым, што ў запаведзі любові да бліжняга ў Новым запавеце
змяніліся аб’ект, суб’ект і матыў. Па-першае, нашым бліжнім стаў кожны чалавек, нават
вораг! Суб’ектам любові да бліжняга стаў я сам. І нарэшце змяніўся матыў і вымярэнне
любові да бліжняга – любіць не “як сябе самаго”, але “як Бог палюбіў нас”! Чалавек
можа любіць сябе ў спосаб памылковы, г.зн., жадаць зла, а не дабра, любіць нешта другаснае,
а не цнатлівае, а любоў Бога заўсёды вядзе да праўды, да дабра, да Айца”, сказаў італьянскі
капуцын.
“Шчыра любіць бліжняга г.зн любіць так глыбока, што ў такой любові
не магчыма падмануць сябе самаго. У такой любові стаіш перад самім сабой, перад сваім
уласным сумленнем, перад поглядам Бога. Такая любоў выходзіць з глыбіні сэрца. “З
новага сэрца і новага Духа”, які мы атрымалі ў часе Хросту”, - адзначыў айцец Раньера
Канталамеса.
Акрамя таго італьянскі прапаведнік звярнуў увагу на неабходнасць
любові ўнутры сённяшняга Касцёла. “Калі аб любові гаворыцца ў апостальскіх тэкстах,
аб ёй не гаворыцца абстрактна, але звяртаецца ўвага на тое, што любоў з’яўляецца фундаментам
на якім будуюцца хрысціянскія супольнасці. У адной са сваіх прамоваў папа Павел VI
казаў: “Сёння Касцёл патрабуе адчування любові паміж усімі сваімі членамі. Любові
бескарыснай, якая ў нашыя сэрцы патрапіла праз дзеянне Духа Святога”, - сказаў на
заканчэнне свайго сённяшняга казання айцец Канталамеса.