Përshpirtëria popullore në qendër të Plenares së Komisionit Papnor për Amerikën Latine.
Komisioni Papnor për Amerikën Latine, filloi sot në Vatikan, punimet e mbledhjes së
përvitshme plenare që do të zhvillohen deri më 8 prill, mbi temën: “Ndikimi i përshpirtërisë
popullore në procesin e ungjillëzimit të Amerikës Latine”. Takimi i nivelit të lartë
u hap sot me Meshën kremtuar në Bazilikën e Shën Pjetrit, nga kardinali Mark Ojé,
president i Komisionit. Të premten e ardhshme pjesëmarrësit do të priten në audiencë
nga Papa Benedikti XVI. Synimi kryesor i këtij takimi është reflektimi mbi domethënien
dhe peshën që përshpirtëria popullore ka pasur gjatë pesë shekujve të Krishterimit
në Amerikën Latine, dhe përpilimi i udhëzimeve baritore në këtë fushë, që do të ndihmojë
në ruajtjen dhe pastrimin e devocionit kolektiv në kontekstin e Misionit Kontinental
që është në zhvillim e sipër në të gjitha dioqezat. Përshpirtëria apo devocioni popullor
konsiderohet si pjesë përbërëse me vlerë të jashtëzakonshme në procesin e ungjillëzimit
të ri nè Amerikën Latine. Ndër synimet e veçanta, Asambleja plenare, ka edhe paraqitjen
e praktikimit të përshpirtërisë popullore në Amerikën latine, shqyrtimin e devijimeve
që janë paraqitur gjatë kohës, trajtimin e shprehjes së religjiozitetit popullor si
pengesë e ungjillëzimit, përpunimin udhëzimeve baritore konkrete, në mënyrë që përshpirtëria
popullore – që nga Benedikti XVI konsiderohet si thesar i çmueshëm i Amerikës Latine
– ti përforcon të Pagëzuarit në fenë e tyre e në përkatësinë e tyre në Kishën katolike,
dhe t’i udhëheq ata drejt një jete të gjallë e vërtet sakramentale. Në takim, marrin
pjesë afër 40 pjesëmarrës mes anëtarëve e këshilltarëve të Komisionit Papnor, ipeshkvij
të ftuar e përgjegjës të dikastereve të Selisë së Shenjtë.